मुख्यमन्त्री केसीले गठन गरे सात सदस्यीय मन्त्रिमण्डल, को-को बने मन्त्री ?

२८ साउन, बुटवल । लुम्बिनी प्रदेशका नवनियूक्त मुख्यमन्त्री कुलप्रसाद केसीले आजै मन्त्रिपरिषद विस्तार गरेका छन् । उनले नेपाली कांग्रेस, नेकपा माओवादी केन्द्र र जनता समाजवादी पार्टी जसपाका सांसदहरु समेटेर सानो आकारको मन्त्रिपरिषद विस्तार गरेका हुन् ।

मन्त्री हुनेहरुमा कांग्रेसबाट डिल्लीबहादुर चौधरी, नेकपा माओवादी केन्द्रबाट कृष्णध्वज खड्का, जनता समाजवादी पार्टीबाट सहसराम यादव, पुरमती ढेंगा र सुमन शर्मा रायमाझी र अजय शाही छन् । चौधरी शहरी तथा ग्रामीण विकास र सहसराम यादव भौतिक पूर्वाधार मन्त्री बनेका छन् ।

त्यस्तै सांसद विमलाकुमारी वली खत्री राज्यमन्त्री बनेकी छन् । तत्कालिन नेकपामा सूर्य चुनाव चिह्नबाट निर्वाचित र पछि माओवादी केन्द्र रोजेकी खत्री राज्यमन्त्री बनेकी हुन् । उनले आफूलाई अघिल्लो सरकारले मुख्यमन्त्री कार्यालयमा बन्धक बनाएको आरोप लगाएकी थिइन् ।

अरु मन्त्रीहरुको मन्त्रालय तोकिएको छैन । त्यस्तै स्वतन्त्र राजनीतिक समूहका अजय शाही पनि मन्त्री बनेका छन् । मुख्यमन्त्री र मन्त्रीहरुले अबको केही बेरमा शपथ लिँदैछन् ।

लुम्बिनी प्रदेशमा जनता समाजवादी पार्टीका ६ सांसदमध्ये शंकर पोखरेलको मन्त्रिपरिषदमा सहभागी भएको भन्दै पार्टीले निष्कासन गरेपछि अब ३ जना मात्र सांसद बाँकी छन् । सांसद रायमाझी पहिले पोखरेलको मन्त्रिपरिषदमा सहभागी भएपनि राजीनामा दिएर बाहिरिएकी थिइन् ।

हृदयश त्रिपाठीले खडा गरेको स्वतन्त्र राजनीतिक समूहको नामबाट सूर्य चुनाव चिह्न लिएर निर्वाचनमा विजयी भएका लुम्बिनी प्रदेशसभामा दुई सांसद छन् ।

यो समूहले यसअघि पोखरेल नेतृत्वको सरकारलाई साथ दिएको थियो र सांसद धर्मबहादुर लाल श्रीवास्तव पोखरेलको सरकारमा सहभागी भएका थिए । अहिले सोही समूहका अर्का सांसद शाही केसी नेतृत्वको मन्त्रिपरिषदमा सहभागी भएका छन् ।