नेपाल पर्यटन बोर्डका सीईओ रेग्मी सुन तस्करी प्रकरणमा मुछिए

२ माघ, काठमाडौं । पर्यटनमन्त्री प्रेम आले सर्वाधिक चर्चामा रहेका छन् । पूर्ववर्ती सरकारले गरेका सबै निर्णयहरु सार्वजनिक गरेर हिरो भने ध्यानमा लागेका आलेले आइतबार पर्यटन नेपाल पर्यटन बोर्डका सीईओ धनञ्जय रेग्मी सुन तस्करी प्रकरणमा मुछिएको पत्रसहित सार्वजनिक गर्न लगाएका छन् ।

अघोषित रुपमा रेग्मी सुन तस्करीमा मुछिएको पत्र उनै पर्यटनमन्त्री आलेले सार्वजनिक गर्न लगाएका हुन् । बोर्डका सिइयो २०७४ साल पुस ७ गते कतार एयरलाइन्सको विमानमार्फत नेपाल आउँदा उनी सुनसहित पक्राउ परेको खुलासा भएको हो ।

उनीमाथि पर्यटन बोर्डले गरेको छानबिनको क्रममा कतार एयरलाइन्सको उडान नम्बर क्युआर ७३० बाट नेपाल आउँदा बिस्कुट आकारको ३ थान सुन ल्याएको र त्यसमा ३० ग्राम अवैध भएपछि पक्राउ परेको खुलासा भएको हो । सो प्रकरणमा त्रिभुवन विमानस्थल भन्सार कार्यालयले २०७४ पुस ७ गते मुद्दा दर्ता गरेकोमा अदालतले ०७७ भदौ २१ मा मुद्दा फैसला गरेको थियो । सो मुद्दामा कसुर ठहर भइ सुन जफतसहित १ लाख ४० हजार ६८५ रुपैयाँ जरिवाना भएको थियो ।

पर्यटन मन्त्रालयले विमानस्थल भन्सार कार्यालयलाई पत्राचार गरेर रेग्मीबारे जानकारी माग गर्दा भन्सार कार्यालयले यसबारे जानकारी गराएको हो । भन्सारले पुस ३० मा मन्त्रालयलाई लेखेको उक्त पत्र आइतबार सार्वजनिक भएको हो । पूर्व पर्यटनमन्त्री योगेश भट्टराइले रेग्मीलाई पर्यटन बोर्डमा सिइयो नियुक्ति गरेका थिए ।

भट्टराइलाई बद्नाम गर्न लागिपरेका आलेले रेग्मीबारे भन्सार कार्यालयले कारवाही गरेको पत्र सार्वजनिक गर्न लगाएका हुन् । तर रेग्मी २०७६ माघमा मात्रै पर्यटन बोर्डको सिइयोमा नियुक्त भएका थिए । पर्यटन बोर्डमा आउनु अघि नै सुन चोरी पैठारीमा मुछिएको खुलेको छ ।