निर्वाचन खर्चबारे कोइरालाले पठाएको जवाफ आयोगसँग मेल खाएन, कानुनबमोजिम कारबाही हुने

१६ वैशाख, काठमाडौं । नेपाली कांग्रेसका नेता डा. शशांक कोइरालाले निर्वाचन खर्चबारे पठाएको जवाफले विषयसँग तालमेल नखाएको भन्दै निर्वाचन आयोगले कानूनबमोजिम कारवाही गर्ने तयारी गरेको छ ।

कोइरालाले सार्वजनिक कार्यक्रममा २०७४ को संघीय निर्वाचनमा ६ करोड खर्च भएको भनि दिएको अभिव्यक्तिबारे आयोगले पत्र लेखेर जवाफ मागेको थियो ।

संघीय निर्वाचनमा ६ करोड खर्च भएको कोइरालाले बताएको कुरा सञ्चारमाध्यममा आएकाले यससम्बन्धमा के भएको हो जानकारी गराउन भन्दै आयोगले कोइरालालाई ७ दिनभित्र जवाफ पेश गर्न भनेको थियो । सञ्चारमाध्याममा आएको भनाई र आयोगमा रहेको विवरणसँग मेल नखाएको आयोग स्रोतको भनाई छ ।

निर्वाचन आयोग स्रोतले दिएको जानकारी अनुसार बर्दघाट निर्वाचन क्षेत्र नम्बर १ बाट २०७४ सालको चुनाव लड्दा कोइरालाले पेश गरेको चुनावी खर्च विवरणमा २१ लाख ७५ हजार रुपैयाँ पेश गरेको देखिएको र सञ्चारमाध्यममा ६ करोड भनेको विषयमा जवाफ नमिलेको हो ।

स्रोतले भन्यो,‘अघिल्लो निर्वाचनमा ‘६ करोड खर्च भयो’ भनेर सार्वजनिक रूपमा बोल्नु भएको थियो । त्यो बेला प्रतिनिधिसभाका उम्मेदवारले २५ लाख मात्रै खर्च गर्न पाउने सीमा तोकिएको थियो । कांग्रेस नेता कोइरालाले २१ लाख ७५ हजार मात्रै खर्च गरेको विवरण आयोगमा पेस गर्नु भएको थियो । त्यसो भए तपाईंले ६ करोड खर्च के–कसरी गर्नुभयो भनेर आयोगले स्पष्टीकरण सोधेको हो । उहाँले जवाफ पठाउनु भएको छ । तर, उहाँले पेस गर्नु भएको कुरोसँग तालमेल नै मिल्दैन ।’

केइरालाले त्यसरी खर्च गरेको भनेर आफूले नबोलेको भन्ने जवाफ दिएको आयोगको भनाई छ । कारबाहीबाट बच्ने र छल्ने हिसाबले जवाफ दिएको ठहर गर्दै कोइरालाले बोलेको हो, होइन भन्ने कुरा लिखित जवाफ नखुलेको र सत्यता नदेखिएको आयोगको ठहर छ । कांग्रेस नेता कोइरालामाथि के कस्तो कारबाही हुन्छ भन्ने कुरा अध्ययनकै प्रक्रियामा रहेकाले कानुनबमोजिम कारबाही हुने आयोगको भनाई छ ।