महानगरका मेयरबारे ओलीको बखान, ‘केशव स्थापितका अगाडी अन्य दलका उम्मेदवार विचरा’

१८ वैशाख, काठमाडौं । नेकपा एमालेका अध्यक्ष केपी शर्मा ओलीले काठमाडौं महानगरको मेयरमा एमालेका उम्मेदरवार केशव स्थापितको अगाडी अरु दलका उम्मेदवार चर्चा योग्यनै नरहेको बताएका छन् । उनले स्थापित सबै क्षेत्रमा परिपक्क, अनुभवी र आँटिले उम्मेदवार भएको बताएका छन् ।

आइतबार काठमाडौंमा आयोजित एक कार्यक्रममा उनले महानगरपालिकाको अनुभव हासिल गरिसकेका स्थापितलाई अघि सारेर एमालेले उचित काम गरेको भन्दै स्थानीय तह निर्वाचनमा उठेका अन्य दलका उम्मेदवारहरु चर्चा समेत गर्न लायक नरहेको टिप्पणी गरे ।

ओलीले यसअघि नै मेयर भसकेका अनुभवी केशव स्थापितलाई लिएर पार्टी निर्वाचनमा होमिएको बताए । उनले स्थापितले काठमाडौंलाई आधुनिक काठमाडौंमा बदल्नेदेखि सडक चौडा गर्ने,माइतीघरमा मण्डला स्थापना गर्ने लगायतका विकास निर्माण काममा अनुभव हासिल गरेको बताए ।

एमालेले काठमाडौंलाई सम्पदा, पुरातात्त्विक सहरलाई नमुना सहरका रूपमा विश्वकै राजधानी बनाउन चाहेको उनले बताए । अरू पार्टीका उमेदवार काठमाडौं महानगरका लागि मेयर बन्ने लायक नै नभएको उनको भनाई छ ।

निर्वाचनमा उम्मेदवार बन्ने इच्छा गर्नु अन्य दलका उम्मेदवारहरुको अधिकारको कुरा भएपनि उनीहरु चर्चा गर्न लायक नभएको ओलीले बताए ।

उनले केशव स्थापितको अनुभव र अन्य युवा उम्मेदवारहरुको जोशलाई मिलन गरेर काठमाडौं महानगरपालिकालाई आफ्नो पार्टी समृद्ध बनाउन चाहेको पनि स्पष्ट पारे ।

पार्टीको चुनावी घोषणा पत्र र स्थानीय तहको प्रतिवद्धता पत्र लिएर चुनावी प्रचार अभियानलाई तीव्रता दिन उनले पार्टीका नेता, कार्यकर्ताहरुलाई उनले निर्देशन दिए ।