विजय र पराजय दुबै लोकतन्त्रका सुदृढ पक्ष हुनः अध्यक्ष दाहाल

३० बैशाख, चितवन । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले निर्वाचनमा हुने हारजित दुबै पक्ष लोकतन्त्रको सुदृढ पक्ष भएको बताएका छन् । निर्वाचनमा हुने हारजितलाई सबैले स्वाभाविक रूपमा लिनुपर्ने बताएका छन् ।

चितवनको भरतपुर महानगरपालिकामा मतदान गरेपछि उनले जितमा अनावश्यक हौसिने र पराजयमा पूरै निराश हुँदा लोकतन्त्र बलियो बन्न नसक्ने बताए । प्रचण्डले मतदातालाई स्वतन्त्रतापूर्वक आत्मविश्वासको साथ निर्वाचनमा सहभागी हुन पनि आह्वान गरे ।

यो निर्वाचन संविधान घोषणापछिको दोस्रो निर्वाचन प्रक्रिया भएकाले सफल हुनुपर्ने धारणा राख्दै उनले सबैले स्वतन्त्रतापूर्वक मतदान गर्नुपर्ने बताए ।

‘आफू हुर्केको ठाउँमा आएर मतदान गर्दा खुरसी लागेको छ । जित्ने र हार्ने निर्वाचन प्रक्रियामा स्वाभाविक हो भनेर मान्नुपर्ने हुन्छ । जितहार हुनकै लागि निर्वाचन हुने हो ।’ प्रचण्डले भने ।

उनले मुलुक अप्ठ्यारोमा परेको अवस्थामा गठबन्धन भएको बताए । उनले आम नेपाली जनताले गठबन्धनको महत्त्व राजनीतिक स्थायित्व र विकास रूपमा लिनुपर्ने बताए ।

प्रचण्डले आफूले चितवनमा दिएको अभिव्यक्ति तोडमरोड गरिएको भन्दै असन्तुष्टि व्यक्त गरे । निर्वाचन प्रचारका क्रममा दाहालले चितवनमा मतदातालाई धम्याक्याएको आरोप लागेको थियो ।