कांग्रेस पहिलो पार्टी बन्नेमा अब सन्देह रहेनः महामन्त्री थापा

३० वैशाख, काठमाडौं । नेपाली कांग्रेसका महामन्त्री गगनकुमार थापाले स्थानीय तह निर्वाचनबाट कांग्रेस पहिलो हुने दाबी गरेका छन् । मतदानपछि उनले कांग्रेस पहिलो पार्टी हुनेमा सन्देह नभएको बताए ।

शुक्रबार काठमाडौंको मैतिदेवस्थित मतदान केन्द्रबाट मतदान गर्ने क्रममा उनले निर्वाचनबाट कांग्रेस सहजै पहिलो पार्टी बन्ने दाबी गरे । उनले पार्टीको महाधिवेशनपछि पार्टी एकढिक्का भएको र त्यो निर्वाचन जित्ने आधार भएको बताए ।

‘अघिल्लो निर्वाचनमा थोरै मतले हामी दोस्रो भयौँ । मतको हिसाबले १०÷१२ हजारले पछि थियौँ । तर, यस पटक पहिलो बन्नेमा सन्देह रहेन’, थापाले काठमाडौंमा पत्रकारहरूसँग भने । उनले कतिपय जिल्लामा गठबन्धनमा समस्या भएपनि धेरै ठाउँमा सकारात्मक रहेको बताए ।