यसरी हुँदैछ काठमाडौं महानगरपालिकाको मतगणना

३१ बैशाख, काठमाडौं ।  काठमाडौं महानगरपालिकाको मतगणना जारीछ । शनिबार बिहान १० बजेदेखि प्रदर्शनीमार्गस्थित राष्ट्रिय सभा गृहमा मतगणना सुरु भएकोले अहिले सम्म प्रारम्भिक नतिजा दिइएको छैन् ।

सर्वदलीय बैठकमा सहमतिपछि काठमाडौं महानगरपालिकाको मतगणना सुरु गरिएको हो । मतगणना सुरु गर्ने निर्णयसँगै वडा नं १ र३२ को मतपेटिका खोलेर मत गन्न सुरु गरिएको हो ।

काठमाडौं महानगरपालिकामा एमालेका केशव स्थापित, गठबन्धनबाट कांग्रेसकी सिर्जना सिंह, स्वतन्त्र उम्मेदवार वालेन्द्र साह, विवेकशील साझाबाट समीक्षा बास्कोटालगायत ५६ जना मेयरका उम्मेदवार रहेका छन् ।

मतगणना स्थलमा स्वतन्त्र उम्मेदवारहरूको तर्फबाट राख्ने प्रतिनिधिको विषयमा सहमति जुट्न नसक्दा मतगणनामा ढिलाई भएको थियो ।

पाँच जना स्वतन्त्र उम्मेदवारको तर्फबाट एक जना प्रतिनिधि राख्ने कुरा भएपछि स्वतन्त्र उम्मेदवारहरूले विरोध गरेका थिए । अहिले एक जना स्वतन्त्र उम्मेदवारको एक जना प्रतिनिधि राख्ने सहमति जुटेपछि मतगणना सुरु भएको हो ।