सात स्थानीय तहसहित देशभर कांग्रेसले बढायो अग्रता, पछ्याउँदै एमाले

१ जेठ, काठमाडौं । नेपाली कांग्रेसले देशभर अग्रता कायम गरेको छ । साता स्थानीय तहसहित अगाडी रहेको कांग्रेसलाई नेकपा एमालेले पछुयाइरहेको छ ।

स्थानीय तह निर्वाचनअन्तर्गत मतदान सम्पन्न भएर देशभरका पालिकाहरूमा मतगणना जारी छ । सुरुवाती चरणमा आएका नतिजाले शनिबार अबेरसम्म अगाडी रहेको नेकपा एमालेलाई पछि पार्दै कांग्रेस अग्रस्थानमा आएको हो ।

कतिपय स्थानीय तहमा मतगणना सम्पन्न भइसकेको छ । सम्पन्न भएका स्थानीय तहको मत परिणामले दलहरूको स्थानीय तहको उपस्थिति देखाइरहेको छ । अहिलेसम्मको मत परिणामानुसार कांग्रेसले सात स्थानीय तहको नेतृत्वसहित अग्रता कायम गरेको छ । कांग्रेसले सात स्थानीय तहमा उपप्रमुख समेत जितेको छ ।

कांग्रेसलाई पच्छ्याइरहेको एमालेले ६ स्थानीय तहको नेतृत्वमा आफ्नो उपस्थिति जनाएको छ । उपप्रमुखतर्फ भने एमालेले पाँच स्थानीय तह जितेको छ । एकीकृत समाजवादीले पनि दुई स्थानीय तहमा प्रमुख र उपप्रमुख दुवै जितेको छ ।

तेस्रो स्थानमा नेकपा (माओवादी केन्द्र) र नेकपा (एकीकृत समाजवादी) रहेका छन् । माओवादी केन्द्रले दुई स्थानीय तहको नेतृत्वमा जित हासिल गरेको छ । उसले दुई स्थानीय तहमै उपप्रमुख समेत जितेको छ ।

मतगणना जारी भएका २६७ स्थानीय तहमा कांग्रेसले अग्रता लिएको छ भने एमालेको १६६ स्थानीय तहमा अग्रता देखिएको छ । माओवादी केन्द्रको १०३ स्थानीय तहमा अग्रता देखिएको छ भने एकीकृत समाजवादीको १२ स्थानीय तहमा अग्रता देखिएको छ ।