नागरिकता विधेयकमा गृहमन्त्रीको सक्रियता, खुमलटारमा प्रचण्डसँग कानूनमन्त्रीसहित छलफल

५  जेठ, काठमाडौं ।  संघीय संसदको चालु अधिवेशनबाटै राजनीतिक सहमति जुटाएर नागरिकता विधेयक पारित गराउन गृहमन्त्री बालकृष्ण खाँणले सक्रियता देखाएका छन् ।

उनले विधेयकमा दलीय सहमति नजुटाउने क्रमम बिहीबार कानूनमन्त्रीलाई समेत राखेर नेकपा माओवादीका अध्यक्ष पुष्पकमल दाहाल‘प्रचण्ड’सँग छलफल गरेका छन् । नागरिकता विधेयकबारे छलफल गर्न गृहमन्त्री खाँण र कानुनमन्त्री गोविन्द शर्मा प्रचण्ड निवास खुमलटार पुगेका थिए ।

आज बिहान ललितपुरको खुमलटारस्थित प्रचण्ड निवासमा भएको छलफलमा नागरिकता विधेयक अघि बढाउने विषयमा कुराकानी भएको र संसदमा पेस गर्न बाँकीरहेका अन्य महत्वपूर्ण विधेयकबारे पनि छलफल भएको थियो ।

गृहमन्त्री खाँणले भने नागरिकता लगायतका विधेयकहरुलाई प्रतिनिधिसभाको जारी अधिवेशनमै राजनीतिक दलहरूबीचको सहमतिमा पेस गरी छलफल गराएर पारित गराउने विषयमा छलफल भएको बताएका छन् ।

खाँणले यसअघि पनि नागरिकता विधेयकबारे पटक–पटक विभिन्न दलहरूसँग छलफल गरिसकेका छन् । सरकारले दलीय सहमतिमा नागरिकता विधेयक संसदमा पेस गर्ने तयारी गरिरहेकाले उनले यस विषयमा सक्रियता बढाएका हुन् ।

नागरिकता विधेयक आम नागरिकको सरोकारको विषय भएकाले दलहरूबीच भिन्न मत हुन नहुने र भरसक आफुले सहमतिको प्रयास गर्ने उनले बताएका छन् । जारी अधिवेशनबाट बजेट सार्वजनिक भएपछि सहमति जुटाएर नागरिकता विधधेयक संसदमा लाने तयारी भइरहेको छ ।