पोखरा महानगरको मेयरमा जितेका धनराजको बालकोटमा बढी चर्चा

११ जेठ,काठमाडौं । नेकपा एमालेले आफ्नो मुख्य सत्रुका रुपमा हेरेको नेकपा एकिकृत समाजवादीका उम्मेदवार धनराज आचार्य पोखरा महानगरपालिकाको मेयरमा विजयी भएपछि उनको चर्चा पाखरासँग भन्दा बालकोटसँग जोडेर हुन थालेकोछ ।

निर्वाचन अघि एमाले अध्यक्ष ओलीले दिएका तुच्छ अभिव्यक्तिको जवाफ उनले फर्काएकाले पनि उनी बालकोटतिर बढी चर्चामा छन् । पार्टी विभाजनपछि एकिकृत समाजवादी रोजेका उनी अहिले पोखराको मेयरमा एमालेका उम्मेदवारलाई हराउँदै विजयी भएका छन् ।

प्रमुखमा विजयी आचार्यले जन्मदेखि मृत्युसम्मका दर्ता प्रक्रिया निःशुल्क गर्ने घोषणा पनि गरेका छन् । उनले विजयी घोषणा भए लगत्तै यस्तो बताएका हुन् ।

आचार्य नेकपा एमालेका कृष्ण थापालई ६ हजार ४५ मतान्तरले पराजित गर्दै निर्वाचित भएका हुन् । उनले ५८ हजार ८९३ मत प्राप्त गर्दा थापाले ५२ हजार ८४८ मत पाए । एकीकृत समाजवादीका आचार्यलाई गठबन्धनले साझा उमेदवार बनाएको थियो ।

उपप्रमुखमा भने नेकपा एमालेकी मञ्जुदेवी गुरुङ विजयी भएकी छन् । उनी ६० हजार ५४६ मतसहित निर्वाचित भएकी हुन् । उनकी निकटतम् प्रतिस्पर्धी नेपाली कांग्रेसकी कोपिला रानाभाटले ५६ हजार ६६३ मत प्राप्त गरिन् । रानाभाट गुरुङभन्दा ३ हजार ८८३ मत पछि परिन् ।

देशकै महत्वपूर्ण महानगर पोखराको मेयरमा आचार्य निर्वाचित हुँदा त्यसको चर्चा एमाले अध्यक्ष केपी शर्मा ओलीको निवास बालकोटसम्म पुगेको छ । आचार्य नेकपा एकिकृत समाजवादीका अध्यक्ष माधव नेपालका लागि एमाले अध्यक्ष ओलीलाई जवाफ फर्काउने गतिलो माध्याम पनि बनेका छन् ।

एमालेको पार्टी राजनीतिमा तीन दशकबढी सक्रिय उनले लाभको पदको टिकट कहिल्यै पाएनन् । पोखरामा धु्रवीकृत ओली गुटले उनलाई एमालेमा रहँदा कहिल्यै अगाडि बढाएन । तर, उनले माधव नेपालको साथ छाडेनन् । दुईदुई पटकको संसद विघटन देखि एमालेमा विग्रह देखिएर समानान्तर कमिटी गठन हुँदासम्म उनी माधव नेपालकै पक्षमा उभिए र उनलाई गण्डकीको राजधानीबाट समर्थन दिए ।

पछि एमाले नै फुट्यो, फुटेको एमालेमा धेरै नेता गएनन्, तर माधव नेपालको नेकपा एकीकृत समाजवादीलाई उनले कास्कीबाट थामिदिए । त्यही उपक्रममा बनेको गठबन्धनले पोखराको प्रमुख समाजवादीलाई दियो । त्यही समाजवादीबाट देशकै ठुलो महानगरको अभिभारा पाँचवर्षको लागि आचार्यको काँधमा आएको छ ।

आचार्यले २५ वर्षदेखिको एमाले विरासतलाई भत्काउँदै मेयरमा निर्वाचित भएका हुन् । यसअघि थापा ०५४ मा एमालेबाट तत्कालीन पोखरा उपमहानगरपालिकाको मेयर निर्वाचित भएका थिए । ०७४ मा एमालेकै मानबहादुर जीसी महानगरको मेयरमा निर्वाचित भएका थिए । यसअघिको निर्वाचनमा एमालेले जितेका वडासमेत यसपल्ट गुमाएको छ ।

पहिला ३३ मध्ये २२ वटा वडा जितेको एमाले यसपल्ट ९ वटामा खुम्चिएको छ । कांग्रेसले पहिला ११ वटा जितेकोमा यसपल्ट २३ वटा पु¥याएको छ । पोखराको वडा नम्बर २२ मा स्वतन्त्र उम्मेदवार हिमलाल बराल निर्वाचित भएका छन् । उनी कांग्रेस र माओवादी केन्द्रको समर्थनमा चुनाव लडेका थिए ।