मूल्यवृद्धि फिर्ताको माग राख्दै सत्तारुढ विद्यार्थी संगठनद्वारा आयल निगम घेराउ, कार्यकारी निर्देशकको राजीनामा माग

११ जेठ, काठमाडौं । पेट्रोलियम पदार्थमा गरिएको मूल्यवृद्धि फिर्ताको माग राख्दै सत्तारुढ दलकै विद्यार्थी संगठनहरूले नेपाल आयल निगम घेराउ गरेका छन् । उनीहरुले पेट्रोलियम पदार्थमा गरिएको मूल्यवृद्धि फिर्ता नभएसम्म आन्दोलन जारी राख्ने जनाएका छन् ।

मध्यान्ह आयल निगमको कार्यालय बबरमहल पुगेका नेविसंघ, अनेरास्ववियु क्रान्तिकारी लगायत सत्तारुढ दल आवद्ध विद्यार्थीहरूले मूल्यवृद्धि खारेज गरी निगमका निर्देशकको राजीनामा पनि माग गरेका छन् । निगमको कार्यकारी प्रमुखमा कांग्रेस निकट उमेशप्रसाद थानी छन् ।

आइतबार रातिदेखि लागु हुनेगरी सातामै दोस्रो पटक नेपाल आयल निगमले इन्धनको मूल्यमा भारी वृद्धि गरेको थियो । आइतबार मध्यरातिदेखि लागु हुने गरी पेट्रोल, डिजल र मट्टीतेल प्रतिलिटर १० रुपैयाँ वृद्धि गरिएको थियो भने खाना पकाउने एलपी ग्याँसको मूल्य सिलिन्डरमा २०० रुपैयाँले बढेको थियो ।

अब एक लिटर पेट्रोलको १८० रुपैयाँ पुगेको छ भने मट्टीतेल र डिजलको १६३ रुपैयाँ तथा एक सिलिन्डर ग्याँसको मूल्य १८०० रुपैयाँ तोकिएको छ । मूल्यबृद्धिको देशभरी विरोध भएपनि सरकारले भने फिर्ता लिन नसकिने बताईरहेको छ ।