एमालेका उमेदवारलाई हराउँदै रूपन्देहीको तिलोत्तमा कांग्रेसका खाँण विजयी

१३ जेठ, बुटवल । रूपन्देहीको तिलोत्तमा नगरपालिकाको प्रमुखमा नेपाली कांग्रेसका नेता एवं गृहमन्त्री बालकृष्ण खाँणका भाई रामकृष्ण खाँण विजयी भएका छन् । उनले नेकपा एमालेका उमेदवार मोहन चापागाइँलाई हराएका हुन् ।

तिलोत्तमामा खसेको ६४ हजार ७२० मतमध्ये कांग्रेसका खाँणले २४ हजार ३९६ मत प्राप्त गरेका छन् भने नेकपा एमालेका चापागाइँले २३ हजार ६३१ मत ल्याएका छन् । नवनिर्वाचित मेयर रामकृष्ण खाँणले जनताको सेवक भएर काम गर्ने प्रतिबद्धता जनाएका छन् ।

उपप्रमुखमा भने एमालेकी जागेश्वरी चौधरी भारी मतान्तरसहित विजयी भएकी छन् । चौधरीले २३ हजार ८६ मत ल्याएकी छन् । उनका निकटतम प्रतिद्वन्दी माओवादी केन्द्रका हेमन्त पाण्डेले ११ हजार ५४६ मत ल्याएका छन् ।
तिलोत्तमा एमाले नेता घनश्याम भुसालको गृह नगर र एमालेका उपाध्यक्ष बिष्णु पौडेलको निर्वाचन क्षेत्र हो । तिलोत्तमामा ०७४ सालमा एमालेले प्रमुख र उपप्रमुख जितेको थियो ।

१७ वडा रहेको तिलोत्तमा नगरपालिकामा वडा नम्बर २, ३, ५, ६, ९, १३, १४, १६ र १७ मा नेपाली कांग्रेस विजयी भएको छ । १, ४, ७, १०, ११, १२ र १५ मा नेकपा एमाले निर्वाचित भएको छ । तिलोत्तमामा कांग्रेस र माओवादीको तालमेल थियो ।

मतपरिणाम सार्वजनिक लगत्तै पत्रकारहरुसँग उनले आफ्ना एजेण्डालाइ मतदाताले सदर गरेकोभन्दै अब सबैलाई मिलाएर काम गर्ने बताए । शासकको रुपमा नगरपालिकामा नबस्ने भन्दै उनले जनताकै सेवामा केन्द्रित रहने र बाँकी जीवन पनि नगरबासीकै सेवा गरेर बिताउने बताए ।