मोवाइलले लोकेसन दिइरहेको छ, स्थानीयले विमान दुर्घटनाबारे केही जानकारी पाए ०१४११३००० मा खबर गर्नूः विमानस्थल

१५ जेठ, काठमाडौं । त्रिभुवन अन्तर्राष्ट्रिय विमानस्थलको कार्यलयले हराइरहेको तारा एयरको विमान दुर्घटनाबारे कुनै जानकारी पाएमा ०१४११३००० नम्बरमा फोन गरी तत्काल जानकारी गराउन स्थानीयसँग आग्रह गरेको छ ।

विमानस्थलले सम्भव भएसम्म खोजीकार्यमा सहयोग पुर्याउन पनि स्थानीयवासीसँग आग्रह गरेको छ । मुस्ताङको लेते पहाड आसपासको मौसम खराव रहेका कारण हेलिकोप्टरमार्फत खोजी गर्न समस्या भइरहेको भन्दै बाहिरबाट गएका उद्धार तथा खोज कार्यमा सम्लग्नहरु भन्दा स्थानीयलाई सो क्षेत्रको मौसम र अवस्थाबारे धेरै जानकारी हुने भएकाले हराइरहेको विमानको खोज तथा उद्धारमा सघाउन स्थानीय बासिन्दासँग अनुरोध गरिएको हो ।

त्रिभूवन विमानस्थल कार्यालयले स्थल र हवाइ मार्गबाट विमानको खोजी भइरहेको उल्लेख गर्दै मुस्ताङका सर्वसाधारणलाई हराइरहेको विमानका बारेमा जानकारी भएमा खोज तथा उद्धार समन्वय केन्द्रको फोन नम्बर ०१४११३००० मा सूचना दिन भनेको छ ।

नागरिक उड्डयन प्राधिकरणका अधिकारीहरुले मुस्ताङको टिटी लेक वरपर तारा एयरको जहाजको खोजी केन्द्रित गरिएको जनाएका छन् । क्याप्टेन प्रभाकर घिमिरेको फोन ट्र्याक गर्दा लेते आसपासमा लोकेसन पत्ता लागेकाले खोजीका लागि स्थानीयसँग आग्रह गरिएको उनीहरुले बताएका छन् ।