फोहोर पठाउन महानगरलाई सास्ती, लोड भएका ट्रक चालकसँग वार्ता जारी

२६ जेठ, काठमाडौं ।  काठमाडौं उपत्यकाको फोहोर बन्चरेडाँडा स्यानिटरी ल्यान्डफिल साइटमा पठाउन थप समस्या देखिएको छ ।उताबाट स्थानीयले अवरोध गर्दै जोखिम मोलेर कुनैपनि फोहोरका गाडी नपाठाउन चेतावनी दिएका छन् भने याता गाडी चालकहरु फोहोर लिएर जान मानिरहेका छैनन् ।

बिहानदेखि फाहोर पठाउन काठमाडौं महानगरपालिकाले जारी राखेको प्रयास निष्कर्षमा पुग्न सकेको छैन । विवाद नमिलेका कारण सो क्षेत्रका स्थानीयले गरेको अवरोधपूर्ण आन्दोलनले बुधबार फिर्ता भएका ट्रकहरु काठमाडौंमै थन्किएका छन् ।

काठमाडौं महानगरपालिकाले फोहोर पठाउन ट्रक चालकहरुसँग वार्ता भइरहेको जानकारी दिएको छ । प्रहरी सुरक्षामा पनि फोहोर विसर्जन स्थलसम्म जान चालकहरु मानिरहेका छैनन् । अहिले पनि वार्ता भइरहेको बताइएको छ ।

बुधबारको झडपका कारण चालकहरु हिचकिचाइरहेका छन् । पेट्रोल बम प्रहार गरेर त्यहाँ जानसकिने अवस्था छैन भनिरहेका छन । गत सोमबार शहरी विकास मन्त्री रामकुमारी झाँक्री, काठमाडौं महानगरपालिकाका मेयर बालेन्द्र साह, उपमेयर सुनिता डंगोलको रोहबरमा त्रिपक्षीय सम्झौता भएको थियो । काठमाडौंमा भएको सहमतिले माग पुरा नभएको भन्दै स्थानीयले आन्दोलन गरिरहेका छन् ।