वितण्डा मच्चाएका अर्थमन्त्री : शर्मालाई नैतिकताको कसीले यसकारण छुन सकेन्

१६ साउन, काठमाडौं । आइतबार साँझ ५ बजे राष्ट्रपति शितलनिवासमा अर्थमन्त्री जनार्दन शर्माको पुर्ननियुक्तिको शपथ हुँदै थियो । उनी अर्थमन्त्रालय फर्कने भएपछि दिउँसोदेखिनै सामाजिक सञ्जालमा विभिन्न टिकाटिप्पणी शुरु भएका थिए । राजनीतिकर्मीदेखि बौद्धिक क्षेत्रले पनि उनको विषयमा टिका टिप्पणी गरेका छन् । सामाजिक सञ्जालमा उनको विगत र अहिलेको अवस्थाबारे तुलना गर्न थालिएको थियो ।

सत्तापक्ष नेपाली कांग्रेसका नेता गुरुराज घिमिरेले आइतबार साँझ उनको पुर्ननियुक्तिलाई लिएर तिखो टिप्पणी गरेका छन् । ‘अर्थमन्त्रीको रुपमा जनार्दन शर्माको पुनर्नियुक्ती राष्ट्रिय अपराधप्रतिको नजरअन्दाज र उदासिनता हो। हाम्रो समाजमा समान्य चोरी-डकैतीलाई सख्त कारवाही गर्ने कानूनी प्रबन्ध छ। तरआज राष्ट्रमा गम्भीर अपराध गर्ने शर्माको पुनरागमन लोकतन्त्रमाथिको उपहास हो। लोकतन्त्रमा जेपनि गर्न पाइन्छ र ?’, उनले सामाजिक सञ्जाल ट्वीटरमा ट्वीट गरेका छन् । सायद उनको विगत सम्झेर घिमिरेले सो ट्वीट गरेको हुनुपर्छ ।

उनको विगतलाई हामीले हेर्ने हो भने ऊर्जा मन्त्रालयको नेतृत्व गर्दा शर्माले बूढीगण्डकी जलविद्युत् आयोजना चिनियाँ कम्पनी सीजीजीसीलाई दिने सम्बन्धमा गरेको सम्झौता पनि विवादित छ । तत्कालीन प्रधानमन्त्री पुष्पकमल दाहाल नेतृत्व सरकारको अन्तिम मन्त्रिपरिषद बैठकले ९ जेठ, २०७४ मा बूढीगण्डकी जलविद्युत् परियोजना निर्माणका लागि बिना प्रतिस्पर्धा चाइना कचौपा ग्रुप कर्पोरेसन (सीजीजीसी) लाई सैद्धान्तिक सहमति दिने निर्णय गरेको थियो ।

त्यसको १२औं दिनमा राजीनामा दिइसकेका सरकारका ऊर्जामन्त्री जनार्दन शर्माले सीजीजीसीका अध्यक्ष ल्यू चस्याङसँग प्रधानमन्त्री निवास बालुवाटार पुगेर यो परियोजनाको निर्माणको जिम्मा सीजीजीसीलाई दिने समझदारीपत्रमा हस्ताक्षर गरेका थिए । यसरी विभिन्न कालखण्डमा उनको विगत राम्रो छैन । खासगरी शिविरमा लडाकुहरुको अरबाैं रकम भ्रष्टाचार गरेको आरोपपनि उनी माथि कायमै छ । यसर्थ उनको नैतिकताको कसी यसकारण पनि कमजोर बन्दै गएको छ ।

०००

आरोप लागेको २५ दिनपछि अर्थमन्त्रीका रुपमा जनार्दन शर्मा मन्त्रालय पुगेर स्वागतको माला थापे । स्वागतको माला लगाउनेमा यसपटक राजश्वसचिव कृष्णहरि पुस्कर मात्रै थिए । अर्थमन्त्रालयमा दुईवटा सचिव छन् । पुस्करका अतिरिक्त मधु मरासिनी, उनी भने शनिवार नै पोखरातिर लागे । संभवत अब उनी अर्थमन्त्रालय फर्किदैनन् । अर्थमन्त्रीका रुपमा शर्मा विवादित बन्दै गएपछि मरासिनी घर बिदामा बसेका थिए । शर्माले राजीनामा दिए लगत्तै उनी पुनः मन्त्रालयमा हाजिर भएका थिए । तर आइतबार मन्त्रीको स्वागतमा देखिएनन्, शर्माले पनि खोजी गरेनन् ।

०००

गठबन्धनको सरकार बन्नु अघि एमाले अध्यक्ष केपी ओलीको नेतृत्वमा सरकार थियो । त्यो सरकार हटाउनका लागि जेजति आरोप लगाइएको थियो, त्यो आरोप पुष्टि गर्नुको साटो गठबन्धन सरकारले अझ बढी कमजोरी गर्दै गएको छ । अर्थमन्त्री शर्माको पुर्ननियुक्तिले कमजोरीलाई बढवा दिएको प्रष्ट हुन्छ । तत्कालीन ओलीको समयमा सरकारमा रहेका दुई मन्त्रीले आरोप लाग्नेवित्तिकै सरकारबाट राजीनामा दिएर बाहिरिएका थिए । ओली सरकारमा मन्त्री भएका शेरबहादुर तामाङ र गोकुल बाँस्कोटाले आरोप लाग्ने वित्तिकै पदबाट राजीनामा दिएर सहजीकरण मात्रै गरेनन, उनीहरु पदमा पनि फर्केर आएनन् । तर माओवादीका जनार्दन शर्मालाई भने जघन्य आरोप लागेपनि उनलाई छानविन समिति बनाएर चोख्याउँदै पुन अर्थमन्त्रीमा नियुक्ति दिइयो ।

०००

माओवादी अध्यक्ष पुष्पकमल दाहाल र प्रधानमन्त्री शेरबहादुर देउवाले अर्थमन्त्रीमा शर्मालाई पुन दोहोर्याएरपछि उनलाई राम्रो काम गर्ने भन्दा पनि गल्ती गर्न थप सहयोगी भएको छ । जसो गरेपनि उन्मुक्ति पाउने भएपछि शर्माका लागि अब झन् अर्थमन्त्रालयमा मनपरी गर्ने बाटो खुला भएको छ । प्रमुख प्रतिपक्षी दल नेकपा एमालेले ९ पुष्ठको अहमति प्रकट गर्दे गर्दा शर्मालाई अर्थमन्त्रीको जिम्मेवारी दिई एमालेलाई चुनौति दिएपनि त्यसलाई प्रचण्डले इगोको रुपमा लिएर शर्मालाई अर्थमन्त्री बनाइयो । नैतिकताको आधारमा शर्मा आफैले पनि सो पद अस्वीकार गर्न सक्थे तर उनले त्यसो नगरी आइतबार साँझ शपथ लिए ।

०००

उनले अघिल्लो सरकारमा रहेका मन्त्रीहरुलाई लागेको आरोपलाई समेत ख्याल नगरी खुरुक्क गएर शपथ लिएका थिए । २०७५ सालमा शेरबहादुर तामाङले बंगलादेशमा पढ्ने नेपाली छात्राहरूको विषयमा गरेको टिप्पणीलाई आधार मानेर राजीनामा दिएका थिए । तत्कालीन कानुनमन्त्री तामाङले राजीनामा दिएका थिए । बंगलादेशमा एमबीबीएस पढ्न जाने नेपाली छात्राले प्रमाणपत्र पाउन आफूलाई सुम्पनुपर्ने अभिव्यक्ति दिएपछि विवादमा परेका थिए । ‘मलाई पदभन्दा प्रतिष्ठा प्यारो छ, त्यसैले राजीनामा गर्दैछु,’ तामाङले राजीनामा दिदै गर्दा भनेका थिए । तर शर्माको हकमा भने त्यो लागु भएन ।

०००

२०७६ सालमा सञ्चारमन्त्री गोकुल बाँस्कोटाले स्वीस कम्पनीका नेपाली एजेन्ट विजय मिश्रसँग कमिशनको बार्गेनिङ गरेको अडियो बाहिरिएको थियो । अडियोमा उनले करोडौँ रुपैयाँ कमिशन मागेको, आफूमातहतका कर्मचारीबारे अपशब्द प्रयोग गरेको भनिएपछि उनी काठमाडौबाहिर रहेका बेला मन्त्रालय नै नगई राजीनामा दिएर बाहिरिएका थिए । तत्कालिन मन्त्री बाँस्कोटाले आराेप प्रमाणित गर्न चुनौति दिएका थिए । बाँस्कोटाले अहिले पनि सरकारलाई आरोप प्रमाणित गर्न चुनौति दिएका छन् । शर्माले त्यसबाट पनि पाठ सिक्न सकेनन ।

०००

२०७६ सालमै संसद सचिवालयकी एक महिला कर्मचारीले सभामुख कृष्णबहादुर महराविरुद्ध यौन दुर्व्यवहारको आरोप लागेपछि उनले राजीनामा दिएका थिए । उनले पछि अदालतबाट सफाइ पाए तर पनि सामाजिक सञ्जालमा उनको आलोचना बन्द भएको छैन । माओवादीले महरालाई बचाउन सकेन । तर शर्मालाई बचाउन भने माओवादी अध्यक्ष आफै लागे । शर्माले आफ्नै नेताबाट पनि पाठ सिक्न सकेनन् ।