दार्चुला जिप दुर्घटना : बुङ्गल गाँउ शोकमा डुब्यो

२ भदौ, दार्चुला । दार्चुलामा भएको जिप दुर्घटनामा परी मृत्यु हुने सवै एउटै गाँउका भएको प्रहरीले जनाएको छ ।दार्चुलाको शैल्यशिखर नगरपालिका-५ को उल्लानीमा भएको जिप दुर्घटनामा परेर मृत्यु भएका सबै बझाङका भएको खुलेको छ ।

कामको खोजीमा भारततर्फ हिंडेका बझाङको बुङ्गल गाउँपालिका ८ का ६ जना मध्ये पाँच जनाको दुर्घटनामा परेर मृत्यु भएको प्रहरीले जनाएको छ । सुदूरपश्चिम प्रदेश ट्राफिक प्रहरी कार्यालय अत्तरियाका प्रहरी निरीक्षक रणबहादुर विष्टका अनुसार दुर्घटनामा मृत्यु हुनेहरूमा बुङ्गल गाउँपालिका-८ का हिक्मत जाग्री, पुने बोहरा, उजाले बोहरा, रैभान बोहरा र चम्फा बोहरा छन् ।

मृतक मध्येका रैभान र चम्फा श्रीमानश्रीमती भएको खुलेको छ । उनीहरुसँगै भारत गइरहेका धनबहादुर जाग्री भने घाइते छन् । उनको गोकुलेश्वर अस्पतालमा उपचार भइरहेको छ । दुर्घटनामा वडाका पाँच जनाको मृत्यु भएपछि बुङ्गल गाउँपालिका–८ शोकमा डुबेको छ ।

बुधबार गोकुलेश्वरबाट खलंगातर्फ गइरहेको उनीहरू सवार से१ज ५५१ नम्बरको जिप दिउँसो करिब ४ बजेतिर दुर्घटनामा परेको थियो । दुर्घटनामा परेर चालकसहित अन्य ९ जना घाइते भएका छन् ।