चितवन १ बाट योजना आयोगका पूर्व उपाध्यक्ष वाग्ले, उपाध्यक्ष पौडेल, राज्यमन्त्री श्रेष्ठ, पूर्व उपकुलपति खानियाँको निवेदन

१४ भदौ, काठमाडौं । राष्ट्रिय योजना आयोगका पूर्वउपाध्यक्ष एवं अर्थशास्त्री स्वर्णिम वाग्लेले चितवन क्षेत्र नम्बर १ मा उम्मेदवार हुन आवेदन दिएका छन्। आगामी मंसिर ४ मा हुने निर्वाचनका लागि उनी उम्मेदवारका लागि दाबी प्रस्तुत गरेका हुन ।

नेपाली कांग्रेसले उम्मेदवार हुन इच्छुकसँग आवेदन माग गरेको थियो। यस्तै कांग्रेसबाट चितवन १ मा प्रधानमन्त्री तथा मन्त्रिपरिषदको कार्यालयका राज्यमन्त्री उमेश श्रेष्ठ, राष्ट्रिय योजना आयोगका उपाध्यक्ष विश्वनाथ पौडेल, त्रिभुवन विश्वविद्यालयका पूर्वउपकुलपति तीर्थराज खनियाँ, नेता राजेन्द्रप्रसाद बुर्लाकोटी र भीमप्रसाद थपलियाले प्रत्यक्षतर्फ उम्मेदवार बन्न आवेदन दिएका हुन्। योजना आयोगमा कार्यकाल सकिएपछि वाग्ले यूएनडिपीको एशिया प्रशान्त क्षेत्रको आर्थिक सल्लाहकार थिए। वाग्ले र पौडेल दुवैजना अमेरिकाबाट अर्थशास्त्रमा विद्यावारिधि गरेका छन् ।

उनीहरु सबैले आफैँ उपस्थित भएर निवेदन दर्ता गरेको कांग्रेस चितवनको क्षेत्रीय समितिले जनाएको छ ।