कमेडियन अपूर्वक्षितिजलाई रिहा गर्न चाैतर्फी दबाब

३ कात्तिक, काठमाडौं । नेपाल प्रहरीले कमेडियन अपूर्वक्षितिज सिंहविरुद्ध पाँच वर्ष जेल सजायको मागसहित चारवटा मुद्दा दर्ता गरेपछि त्यसको चौतर्फी आलोचना भएको छ । तत्काल रिहाइको आवाज व्यापक बन्दै गएको छ ।

नेवार समुदायमाथि व्यंग्य गरेको भिडियो युट्युबमा राखेपछि एक सय चारजना अभियन्ताले सिंहविरुद्ध प्रहरीमा मानहानीको उजुरी दिएका थिए । प्रहरीमा उजुरी परेलगत्तै सार्वजनिक माफी माग्दै सिंहले युट्युबबाट भिडियोसमेत हटाइसकेका छन् । दसैंअघि नै उनी प्रहरीको हिरासतमा थिए । तर कोभिड लागेपछि प्रहरीले उनलाई छाडेको थियो ।

मुद्दा अनुसन्धान नसकिएको भन्दै प्रहरीले पुन: पत्र पठाएपछि उनी मंगलबार प्रहरीकहाँ गएका थिए । त्यहीँ उनलाई पक्राउ गरी हिरासतमा राख्दै आएको छ । बुधबार प्रहरीले अपूर्वविरुद्ध चारवटा मुद्दा लगाउँदै पाँच वर्ष जेल सजायको माग गरेपछि अहिले सामाजिक सञ्जाल प्रयोगकर्ताहरूले प्रहरीको मागदाबीको विरोध गरिरहेका छन् ।

उनीहरूले फेसबुक, ट्विटरलगायतका विभिन्न सामाजिक सञ्जालमार्फत प्रहरीले अपूर्वमाथि अनाहकमा मुद्दा चलाएको भन्दै आलोचना गरेका छन् ।

‘जातीय भावना–सद्भाव कसरी कमजोर हुँदैछ भन्ने कुराको ज्वलन्त उदाहरण हो, ‘स्ट्यान्डअप कमेडियन’ अपूर्व क्षितिजको घटना। माफी मागिसके। युट्युबबाट कमेडी हटाइसके। तैपनि उनीमाथि यो ज्यादती ! अति नगरौं । समाज यसरी बिग्रियो भने त्यसको रापमा हामी–हाम्रै सन्तान खरानी हुनेछन्, अन्य कयौँ देशमा जस्तै,’ राप्रपा नेता रवीन्द्र मिश्रले लेखेका छन् । सिंहलाई बिहीबार अदालत लगिएको छ।