डेङ्गु संक्रमित राज्यमन्त्री केसीको स्वास्थ्यमा सुधार

४ कात्तिक, काठमाडौं । स्वास्थ्य तथा जनसंख्या राज्यमन्त्री हिराचन्द्र केसीको स्वास्थ्यमा सुधार आएको छ । डेङ्गु सङ्क्रमण भएपछि वीर अस्पतालमा उपचाररत केसीको स्वास्थ्य अवस्था सुधार हुँदै गएको अस्पतालका निमित्त प्रमुख प्रशासकीय अधिकारी डा. भूपेन्द्र बस्नेतले जानकारी दिए ।

यसअघि राज्यमन्त्री केसीको टेकुस्थित शुक्रराज ट्रपिकल तथा सरुवा रोग अस्पतालमा उपचार गरिएको थियो । ‘उनको स्थ्यावस्था सुधार भइरहेको छ । एक दुई दिन सघन उपचार कक्ष (आइसियु)मै चिकित्सकको निगरानीमा राख्नेछौं’ उनले भने, ‘त्यसपछि डिस्चार्ज गर्छौैं ।’ उनले राज्यमन्त्री केसीलाई थप निगरानी गर्नुपर्ने भएकाले आइसियुमा राखिएको बताए ।