सुनसरी–४ मा ज्ञानेन्द्रलाई एमसीसीको डर, जगदीशलाई मुस्लिम समुदायको भर !

१४ कात्तिक, इटहरी ।  तत्कालिन सुनसरी-६ रहेको निर्वाचन क्षेत्र अहिले ४ मा पर्छ । यो क्षेत्र पूर्वप्रधानमन्त्री एवं तत्कालिन नेपाली कांग्रेसका सभापति स्व.गिरिजाप्रसाद कोइरालाको निर्वाचन क्षेत्र थियो । उनले तीन पटक यस क्षेत्रबाट निर्वाचन जितेका थिए । २०७४ को निर्वाचनमा पनि कांग्रेसका उम्मेदवार ज्ञानेन्द्रबहादुर कार्कीले जितेका थिए । तर यसपटक भने कार्कीले सहजै चुनाव जित्ने अवस्था देखिएको छैन् ।

आगामी मंसिर ४ गते हुने प्रदेश र प्रतिनिधिसभा निर्वाचनका लागि यो क्षेत्रमा सत्ता गठबन्धनका साझा उम्मेदवार ज्ञानेन्द्रबहादुर कार्की र नेकपा एमाालेका उम्मेदवार जगदीशप्रसाद कुसियैतबीच प्रतिस्पर्धा हुँदैछ । केन्द्रीय राजनीतिमा प्रभाव राख्दै आएको यो क्षेत्रबाट निर्वाचित हुनेहरु सबै सत्तामा पुगेका छन् । अहिले पनि कार्की मन्त्री छन भने कुसियैत पनि पुराना र केन्द्रीय राजनीतिमा प्रभाव जमाउने पुराना कम्युनिष्ट नेता हुन् ।
पटक पटक चुनाव हारेपछि भोजपुर छाडेर सुनसरी झरेका कार्कीले गत आम निर्वाचनमा चुनाव जितेपनि उक्त क्षेत्रमा काम नगरेको आरोज स्थानीय मतदाताको छ । त्योभन्दा पनि एमसीसी पास गराउन उनले ठूलो भूमिका खेलेको भन्दै उनीको विरोध पनि भइरहेको छ । कार्की उम्मेदवार बनेको बराह नगरपालिकामा एमसीसी विरोधीहरुको बाहुल्यता छ । यहाँबाट गत निर्वाचनमा पाएको मत पनि कार्कीले नपाउने सम्भावना बढेको छ ।
०७४ को निर्वाचनमा नेपाली कांग्रेसका कार्की निर्वाचित भएको यो क्षेत्रमा मुस्लिम समुदायको बाहुल्यता छ । कोइरालाको निधनपछि जितेका कार्की अहिले बहालवाला सञ्चार तथा सूचना प्रविधिमन्त्री समेत हुन् । अहिले उनै कार्की र जगदीशप्रसाद कुसियैतबीच मुख्य प्रतिस्पर्धा रोचक बनिरहेको छ । कुसियैत ०५६ सालको उपनिर्वाचन र ०७४ मा सुनसरी–४ ‘ख’बाट प्रदेशसभा सदस्यमा विजयी भएका थिए । त्यति बेला कुुसियैतले कांग्रेसका उमेदवार रेवती दुलाललाई हराएका थिए ।

०७४ मा क्षेत्र परिवर्तन गर्दै सुनसरी आएका कार्कीले नेकपा एमालेका प्रतिस्पर्धी रमेश श्रेष्ठलाई ६ हजार ५९७ मतान्तरले पराजित गरेका थिए । जगदीशप्रसाद कुसियैत सुनसरीका पुराना कम्युनिस्ट नेता हुन् । उनी ०५६ मा गिरिजाप्रसाद कोइरालासँग हारेका थिए । लगत्तै ०५६ को उपनिर्वाचनमा गिरिजाप्रसादले हरि सापकोटालाई आफ्नो उत्तराधिकारी बनाउँदै निर्वाचन लडाए । त्यति बेला कुसियैतले ‘रैथाने भर्सेस आगन्तुक’को नारा लगाए र त्यही नाराले उनले बाजी मारेका थिए ।

उनको सोही नाराले २०७४ को निर्वाचनमा पनि काम गर्याे । प्रदेशसभा सदस्य पदको उमेदवार रहेका बेला उनले जातीय ‘सेन्टिमेन्ट’ पनि ‘क्यास’ गरे र विजयी भए । कुसियैत प्रदेश सरकारका वन, वातावरण तथा उद्योगमन्त्री भएर लामो समय सत्तामा रहे । त्यति बेला आफ्नो क्षेत्रमा धेरै विकास निर्माणको काम गरेको उनको जिकिर छ । लामो समय कांग्रेससहित अरू पार्टीले जिते पनि स्थानीयका लागि काम नगरेको उनको आरोप छ ।

उनको प्रभाव तल्लो तहसम्म देखिन्छ । मधेसी र मुस्लिम समुदायको बाक्लो बसोबास रहेको यो क्षेत्रमा उनलाई जातीय सहानुभूति पनि प्राप्त छ । योपटक पनि कुसियैतले ०५६ सालकै नारा दोहोर्याएका छन् । विकास निर्माणको काम गरेको भन्दै मतदाता रिझाउन उनी घरदैलो गरिरहेका छन् ।

निर्वाचनमा मत दिएर जिताएर पठाएका व्यक्ति देशको प्रधानमन्त्री, मन्त्री बने पनि विकासको फड्को मार्न नसकेको यस क्षेत्रका मतदाताको आरोप छ । ०७४ मा भोजपुरको निर्वाचन क्षेत्र छाडेका ज्ञानेन्द्रबहादुर कार्की सुनसरी–४ बाट विजयी भएर अर्थ, कानुन र सञ्चारमन्त्री बने ।

०७४ मा पूर्वाधार विकास गर्ने आफूले गरेको वाचामध्ये ८० प्रतिशत पूरा गरेको उनको भनाइ छ । जनताको आर्थिक समृद्धि र रोजगारी सिर्जना अबको मुख्य एजेन्डा रहेको कार्कीले बताए । सुनसरी निर्वाचन क्षेत्र नम्बर–४ मा रामधुनी नगरपालिकाका वडा नम्बर ४, बराह नगरपालिकाका वडा नम्बर ६, ७, ८, ९, १० र ११ पर्छन् । कोसी गाउँपालिकाका सबै वडा पनि यसै क्षेत्रमा पर्छन् ।

यस्तै, इनरुवा नगरपालिकाका वडा नम्बर ३, ४ र ८ पर्छन् । भोक्राहा गाउँपालिकाका सबै वडाहरू पर्छन् । हरिनगर गाउँपालिकाका वडा नम्बर १, २, ४, ५, ६ र ७ पनि यसै क्षेत्रमा पर्छन् । मतदाताका हिसाबले कोसी, भोक्राहा र हरिनगरा गाउँपालिकामा मधेसी र मुस्लिम समुदायको बाक्लो बसोबास छ । यो क्षेत्रमा कुसियैतको मधेसी र स्थानीयवासीको एजेन्डाले राम्रै काम गर्ने देखिन्छ । विगतका निर्वाचन जित्न पनि यो ‘फ्याक्टर’ महत्वपूर्ण रहेको थियो । सेन्टिमेन्ट मत कुसियैतले पाउन सक्छन् ।

गएको स्थानीय तह निर्वाचनमा सुनसरीको यो क्षेत्रमा पर्ने रामधुनीबाहेक सबै पालिकाहरूमा कांग्रेस विजयी भएको थियो । मुस्लिम समुदायको बाक्लो बसोबास भएको क्षेत्र कोसी गाउँपालिकामा ऐयुब अन्सारी दोस्रोपटक अध्यक्षमा निर्वाचित भए । उनको त्यहाँ राम्रो प्रभाव छ । हरिनगरा गाउँपालिकामा पनि गफार अन्सारी दोस्रोपटक अध्यक्षमा विजयी भएर कार्य गरिरहेका छन् । मुस्लिम समुदायको मत तान्न सक्ने यी दुई नेताहरू उमेदवार कार्कीको ‘किचन क्याबिनेट’ सदस्य भएकाले बढी प्रभाव पार्न सक्ने अनुमान गरिएको छ ।