मंसिर ४ को चुनाव संविधानका पक्षधर र विघटनका पक्षधरबीचको लडाई होः प्रचण्ड

१८ कात्तिक, गोरखा ।  नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आगामी मंसिर ४ को प्रदेश र प्रतिनिधिसभा निर्वाचन विगतमा भएका आम निर्वाचन जस्तो नभएको बताएका छन् । उनले यो निर्वाचन संविधानको पक्षधर र संविधान विघटन गर्न चाहने पक्षबीच बनेका दुईवटा गठबन्धनबीच वारपारको लडाइ भएको दावी गरेका छन् ।

सत्ता गठबन्धन दलहरूको चुनावी जन–भेटघाट कार्यक्रम अन्तर्गत गोरखा नगरपालिका–१२ दसकिलोमा भएको कोणसभालाई सम्वोधन गर्दै उनले समावेशी, समानुपातिक मान्यतालाई उल्टाउन चाहने गठबन्धनलाई मंसिर चारको महासंग्राममा पराजित गर्नुपर्ने बताए । यस पटक निर्वाचनमा नेपालमा समान्ती निरंकुशतासहितको राजतन्त्र पुनस्थापना चाहनेहरूको छुट्टै गठबन्धन आफुहरुसँग प्रतिस्पर्धा गर्न आएको उनको भनाइ थियो ।

प्रचण्डले पाँच दलीय गठबन्धन र अर्को गठबन्धन मंसिर ४ को निर्वाचनमा आमने–सामने हुने बताए । जनताले पाएको संवैधानिक अधिकार रक्षा गर्ने पक्षमा रहेको आफूहरूको गठबन्धन र संविधान मिच्ने र च्यात्ने पक्षको अर्को गठबन्धनको फैसला मंसिर ४ मा हुने निर्वाचनमा जनताले गर्नुपर्ने बताए ।

उनले भने, ‘हाम्रो गठबन्धन लोकतान्त्रिक गणतन्त्रको घोषणा, महिला, दलित, आदिवासी, जनजाति, मुस्लीम थारु सबैलाई पहिचान र अधिकार सहितको संविधानको पक्षमा छ । अर्को गठबन्धन जो यो संविधानलाई कुनै न कुनै रुपमा विघटन गराउन चाहन्छ । समावेशी समानुपाति मान्यतालाई उल्टाउन चाहन्छ । गणतन्त्रप्रति नकरात्मक घारणा राख्न चाहन्छ । फेरि एक पटक नेपालमा समान्ती निरंकुशता सहितको राजतन्त्र पुनःस्थापना चाहनेहरूको गठबन्धन छ ।’

आफूहरूको गठबन्धन पवित्र रहेको दाबी गर्दै उनले अर्को गठबन्धन स्वभाविक नभएको बताए । सत्ता गठबन्धन अग्रगमनको पक्षमा उभिएको र अग्रगमनलाई जिताउने र पश्चगमनलाई पराजित गर्ने अवसर हाम्रो जनताको अगारी आएको बताए । उनले कसैले पनि एक भोट तलमाथि गरे विपक्ष्ँी गठबन्धनलार्य फाइदा पुग्ने बताए ।