ग्वार्को सवारी दुर्घटना : गाडी र चालक फेला, मृतकको पहिचान खुल्न सकेन

२० कात्तिक, काठमाडौं । ललितपुरको ग्वार्को स्थित सडकमा बाटो काटिरहेकी पैदलयात्री युवतीलाई ठक्कर दिएर फरार भएको गाडी र चालकलाई प्रहरीले पक्राउ गरेको छ ।

कात्तिक १२ गते बेलुका ८ बजेतिर ग्वार्कोमा बाटो काट्दै गरेकी अन्दाजी २२ वर्षकी एक युवतीलाई गाडीले ठक्कर दिँदा गम्भीर घाइते भएको र उपचारका लागि अस्पताल पुर्याइए पनि उपचारका क्रममा मृत्यु भएको थियो । मृतकको सनाखत अझै हुन सकेको छैन ।

ठक्कर दिएर भागेको गाडीको नम्बर प्लेट खुल्न सकेको थिएन । सोही कारण साता दिनसम्म गाडी र चालकलाई नियन्त्रणमा लिन सकेको थिएन ।

सुक्ष्म अध्धयन र खोजीपछि जिल्ला प्रहरी परिसर ललितपुरले बागमती इम्बोस्ट नम्बर प्लेट भएको प्रदेश बी एए ५५६३ नम्बरको स्कार्पियो गाडी र चालक प्युठान नगरपालिका–२ का ४७ वर्षीय वीरबहादुर राउतलार्ई एक सातापछि शनिबार मात्र नियन्त्रणमा लिन सफल भएको हो ।

पक्राउ गरिएका चालकलाई सवारी ज्यानको कसुरमा म्याद लिएर अनुसन्धान अघि बढाइएको ललितपुर प्रहरीले जनाएको छ । मृतक युवतीको बारेमा प्रहरीले आफन्त हराएको खबर भएमा सम्पर्क गर्न भनेकाे छ ।