वार्ता भइरहेकाे छ, विप्लव समूहले चुनाव बिथोल्न मिल्दैन : गृहमन्त्री

२२ कात्तिक, बुटवल । नेपाली कांग्रेसका नेता तथा गृहमन्त्री बालकृष्ण खाणले नेत्रविक्रम चन्द नेतृत्वको नेकपालाई राजनीतिक मूलधारमा ल्याउन सरकार र समूहबीच वार्ता भइरहेको बताएका छन् । उनले विप्लव समूले राखेका माग क्रमश: सम्बोधन भइरहेको भन्दै चुनाव बिथोल्ने कुनै किसिमका गतिविधि गर्न नमिल्ने बताएका छन् ।

मंगलबार रुपन्देहीको तिलोत्तमास्थित करौजियामा मंगलबार आयोजित एक कार्यक्रममा बोल्दै गृहमन्त्री खाणले नेकपाका प्रवक्ता खड्गबहादुर विश्वकर्मा ‘प्रकाण्ड’सँग २ दिनअघि भैरहवामा यस विषयमा वार्ता भएको र थप वार्ता जारी राख्ने सहमतिसमेत भएको जनाए । उनले विप्लव नेतृत्वमा रहेको समूहका नेता कार्यकर्ता रिहाइको काम पनि सरकारले गरिरहेको दाबी गरेका छन् ।

उनले कारागारमा रहेका बन्दीलाई प्रक्रिया मिलाएर छाड्ने, मुद्दा फिर्ता लिनेलगायत विषय वार्तामा छलफल अहिले पनि जारी रहेकाले उक्त समूह चुनावमा भाग लिन तयार हुनुकाे विकल्प नरहेकाे बताए । पूर्ववर्ती सरकारले गरेको सम्झौताअनुसार कतिपय बन्दीहरुलाई छोडिसकेको भन्दै खाणले अन्यलाई पनि जेलमुक्त गर्न कानुन संशोधनका लागि फाइल कानुन मन्त्रालयमा पठाइएको बताए ।

खाणले नेकपाका नेता कार्यकर्तासमेत निर्वाचनमा भाग लिन सहमत भए प्रशासनले धरपकड नगर्ने र अन्य नागरिकसरह मतदान गर्ने अवसर दिने प्रस्ताव सरकारी पक्षले वार्तामा सर्त राखेको जानकारी दिए ।

उनले भने, ‘उहाँहरू शान्तिपूर्ण तरिकाबाट मतदान गर्न आए प्रशासनबाट धरपकड हुनेछैन । हामीले वचन दिएका छौँ । तर, मतदान बिथोल्न खोजे र मतदातालाई आतंकित पारेकाे खण्डमा सरकार बाध्य भएर कारवाहीमा जानुपर्छ । यो वातावरण नबनाउन भनेका छौँ ।’

नेकपा वार्ता टोलीका संयोजक प्रकाण्डले काठमाडौंमा जारी रहेको उक्त पार्टीको बैठकमा प्रस्ताव राख्ने र सरकारसँग थप छलफल गर्ने बताएको गृहमन्त्री खाणले बताए । गृहमन्त्री खाणले निर्वाचन शान्तिपूर्ण रूपमा सम्पन्न गर्न र विद्रोहको बाटोमा लागेका समूहलाई मूलधारमा ल्याउने थरुहट समूहसँग पनि सरकारले वार्ताको पहल गरिरहेको बताए ।