गठबन्धनविरुद्ध कार्य गरेको आरोपमा गण्डकीका उर्जामन्त्री बर्खास्त

२२ कात्तिक, पोखरा । गण्डकीका उर्जा, जलश्रोत तथा खानेपानी मन्त्री हरिशरण आचार्य बर्खास्तीमा परेका छन् । उनलाई बर्खास्त गर्न मुख्यमन्त्री कृष्णचन्द्र नेपाली पोखरेलले प्रदेश प्रमुखसमक्ष पत्र पठाएपछि बखास्तमा परेका हुन् । गोरखा–२ घर भएका आचार्यले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’विरुद्ध मत मागेको आरोप लागेपछि मुख्यमन्त्रीले हटाउन पत्र काटेको बताइएको छ ।

मुख्यमन्त्री पोखरेलका प्रेस संयोजक भरत कोइरालाका अनुसार आचार्यलाई बर्खास्त गर्न प्रदेश प्रमुखलाई पत्र पठाइएको हो । आचार्य २०७४ सालमा बाबुराम भट्टराई नेतृत्वको नयाँ शक्ति पार्टी नेपालबाट गण्डकी प्रदेशसभामा निर्वाचित भएका थिए । गोरखामा आचार्यले आफूविरुद्ध मत मागेको भन्दै प्रचण्डले आचार्यविरुद्ध बाबुराम भट्टराईसमक्ष पनि गुनासो गरेकाृ स्रोतको भनाइ छ ।

प्रधानमन्त्री शेरबहादुर देउवासमक्ष पनि प्रचण्डले गुनासो गरेका थिए । देउवा समक्ष गुनासो पुगेपछि उनले गण्डकीका मुख्यमन्त्री पोखरेलसँग यसबारे जानकार ििलएका थिए । बाबुराम भट्टराई नेतृत्वको नेपाल समाजवादी पार्टीमा रहेका उनी ४ मंसिरको प्रदेशसभा निर्वाचनमा गोरखा क्षेत्र नम्बर २ (क) बाट उम्मेदवारको आकांक्षी थिए । नेपाल समाजवादी पार्टीबाट फणिन्द्र देवकोटा प्रदेशसभा सदस्य उम्मेदवार भएपछि आचार्यले स्वतन्त्र उम्मेदवारी दिएका थिए, तर पछि फिर्ता लिएका थिए ।