नेतृत्व परिवर्तनका लागि मेरो जित आवश्यक छः गगन थापा

२२ कात्तिक, काठमाडौं । नेपाली कांग्रेसका महामन्त्री गगनकुमार थापाले पार्टीमा नेतृत्व परिवर्तनका लागि आफ्नो जित अनिर्वाय भएको बताएका छन् । उनले आफूलाई संसदमा निर्वाचित गरे नेतृत्व परिवर्तनका लागि पार्टीभित्र दवाव पर्ने उनको भनाइ छ । आफू सांसद भए मात्रै कांग्रेसभित्र संसदीय दलको निर्वाचनमा प्रतिस्पर्धा हुने र सरकारको नेतृत्व परिवर्तन गर्न सम्भव हुने थापनले बताएकबा छन् ।

नेपाली कांग्रेस काभ्रे–काठमाडौं सम्पर्क समन्वय समितिले मंगलबार काठमाडौं– ४ मा आयोजना गरेको कार्यक्रममा उनले आफूले निर्वाचन जितेर गए मात्रै मतदाताले चाहेअनुसार नेतृत्व परिवर्तन हुने बताए । आफूलाई संसदमा निर्वाचन गराएर पठाए १० वर्षमा मुलुकको राजनीति पूरै सुधार गर्ने उनले प्रतिबद्धतासमेत व्यक्त गरे ।

‘कोही प्रधानमन्त्री निर्वाचित हुने होइन । यहाँ त सांसद निर्वाचित भएर जाने हो । अनि, त्यो सांसद आफ्नो संसदीय दलमा गएर निर्वाचन लड्छ । अनि, निर्वाचित भयो भने बल्ल त्यहाँ दाबी गर्न पाउँछ,’ उनले भने, ‘मेरो मतदातालाई गएर तपाईंले यो कुरा बताइदिनुपर्नेछ, जो परिवर्तनको पक्षमा छन् । भनिदिनुपर्नेछ– कुरा बुझाइदिनुपर्नेछ । तपाईं आफैँ हुनुहुन्छ त्यो ठाउँमा । तपाईं गइदिनुपर्नेछ । तपाईंहरू मलाई अवसर दिनुहोस् । म तपाईंहरूलाई १० वर्षमा सुध्रेको राजनीति दिनेछु ।’

महामन्त्री थापाले अबको निर्वाचनपछि पनि मतदाताको प्रतिष्ठा राख्ने काम सांसदहरूले नगरे मुलुकमा संघीय लोकतान्त्रिक गणतन्त्रात्मक शासन व्यवस्था नै नरहने चेतावनीसमेत दिए । उनले मतदाताले पनि कुन उम्मेदवार कस्तो हो र उसलाई किन मतदान गर्ने भन्ने कुरामा ध्यान दिनुपर्ने बताए ।