जय नेपाल र लालसलाम मिलेपछि देशमा जुनसुकै परिवर्तन सम्भव छः प्रचण्ड

२४ कात्तिक, काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ जय नेपाल र लालसलाम मिलेपछि देशमा कुनै पनि परिवर्तन असम्भव नहुने बताएका छन् । उनले देशमा ठूला राजनीतिक परिवर्तन जय नेपाल र लालसलाम मिलेर नै भएको बताउदै अब आर्थिक परिवर्तनको सिंगो एजेण्डा बोकेर जय नेपाल र लालसलाम जनतामाझ आएको बताएका छन् ।

प्रचण्डले कांग्रेसका तत्कालीन सभापति गिरिजाप्रसाद कोइराला र आफूले शान्ति सम्झौतामा हस्ताक्षर गरेको दिनमा जय नेपाल र लालसलाम एकैठाउँमा आएको बताउँदै अबको निर्वाचनमा पनि मिलेर अघि बढ्न कार्यकर्तालाई सुझाव दिएका छन् । गोरखामा भएको चुनावी सभालाई सम्बोधन गर्दै उनले यस्तो बताएका हुन् । कार्यक्रममा सुरुमै उनले जय नेपालबाट सुरु गरेका थिए ।

‘विस्तृत शान्ति सम्झौतामा गिरिजाप्रसाद कोइराला र मैले हस्ताक्षर गरेपछि शान्तिको नयाँ प्रक्रिया पनि सुरु भयो,उनले भने, ‘देश त्यसपछि गणतन्त्रमा जाने प्रक्रिया सुरु गरिएको हो । जुनदिन गिरिजाप्रसाद कोइराला र मैले एउटै काजगमा हस्ताक्षर गर्यौँ । त्यही दिन जय नेपाल र लालसलाम एकठाउँमा उभिएका हुन् ।’उनले दुवै पार्टीका कार्यकर्ताले एक अर्कालाई सहयोग गर्न आग्रह पनि गरे ।

प्रचण्डले भने, ‘हामी भ्रममा नपरौँ । यो देशमा ठूला परिवर्तन जय नेपाल र लालसलाम मिलेरै भएका छन् । गिरिजाबाबु र मैले हस्ताक्षर गरेको दिनबाट मैले पनि रुखमा भोट हाल्न सुरु गरेको हो । गिरिजाबाबुले पनि हँसिया हथौडामा भोट हाल्न सुरु गर्नुभएको हो । अहिले पनि हामी मिलेनौँ भने परिवर्तन उल्टिन सक्छ ।’

गोरखा जिल्ला अजिरकोट गाउँपालिका–३, भच्चेकमा सम्बोधन गर्दै कुनै संकोच नमानी गठबन्धनको पक्षमा लाग्न आग्रह गरे । उनले शान्ति प्रक्रियामा गिरिजाप्रसाद कोइराला र आफूले हस्ताक्षर गरेदेखि नै कांग्रेस र माओवादीको सहकार्य भएको बताए । प्रतिक्रियावादीहरूले देशमा जातीय द्वन्द्व फैलाउन खोजेको उनको आरोप थियो ।

उनले भने, ‘गठबन्धन निर्वाचनको लागि मात्रै भएको होइन । संविधान उल्ट्याएर देशलाई अध्यारोतर्फ धकेल्न खोजेपछि गठबन्धन बनाएका हौँ । यो राष्ट्रको आवश्यक बनेको छ ।’ नागरिकता विधेयक प्रमाणीकरण नगरेर राष्ट्रपति विद्यादेवी भण्डारीले संविधानको उल्लंघन गरेको प्रचण्डको आरोप छ । उनले अहिले पनि संविधानविरुद्ध शक्तिहरू सक्रिय भएर टाउको उठाउन खोजेकाले सचेत हुनुपर्ने बताए । गोरखाको विकासको लागि कुनै कसर बाँकी नराख्ने उनको प्रतिबद्धता थियो ।