बिरामीको नाटक गरेर चुनाव प्रचारमा हेलिकप्टर प्रयोग गरेको उजुरी

२७ कात्तिक, काठमाडौं । चुनाव प्रचारमा हेलिकप्टर प्रयोग गरेको दुइवटा उजुरी निर्वाचन आयोगमा परेको छ । आइतबार निर्वाचन आयोगमा भएको निर्वाचन आचारसंहिता कार्यान्वयनसम्बन्धी एकीकृत कार्ययोजना, २०७९ माथिको छलफलमा प्रमुख आयुक्त दिनेश थपलियाले चुनावको प्रचार गर्न बिरामी भएको नाटक गरेर हेलिकप्टर प्रयोग गरेको उजुरी आएको बताए ।

‘‘हुँदै नभएको बिरामी लिएर उडेको भन्ने दुई वटा इस्यू आएका छन् । संखुवासभाको केस पनि मनाङको केस पनि यही । यो त गम्भीर भयो । यसमा तुरून्त एक्सनमा जानुपर्छ’ प्रमुख आयुक्त थपलियाले भने ।

उजुरीले प्रमुख जिल्ला अधिकारी र प्रहरी प्रमुखमाथि प्रश्न उठेको उनको भनाइ थियो । उनले आचारसंहिता उल्लंघन सामाजिक सञ्जालबाट धेरै उल्लंघन भएको बताए ।उनले मिथ्या सूचना प्रवाह गरेर अरुको चरित्र हत्या गर्ने, अपमान गर्ने, घृणा फैलाउने गतिविधि नगर्न सचेत गराए । ठूला नेता नै अर्को नेतालाई सत्तोसराप नगरीकन भाषण नै नसिध्याउने प्रवृत्ति बढेको बताउँदै यस किसिमका इस्यूहरु युट्युब, भाइबर, फेसबुकबाट आइरहेको बताए ।