राजनीतिक दल स्वार्थमा डुबेपछि स्वतन्त्र उम्मेदवारी : खान

२८ कात्तिक, भैरहवा । रुपन्देही १ को (ख) का उम्मेदवार असलम खानले राजनीतिक दलबाट चाहना र आकांक्षा बमोजिम विकास नभएकाले आफूले स्वतन्त्र उम्मेदवारी दिएको विचार राखेका छन् ।

राजनीतिक दलका नेताहरु व्यक्तिगत स्वार्थमा डुबेर देश विकास र जनतालाई अलपत्र छाडेपछि आफूले दलबाहिर गएर स्वतन्त्र उम्मेदवारी दिएको उनको भनाइ छ । भैरहवामा सञ्चारकर्मीहरूसँगको छलफलमा खानले १५ वर्षदेखि राजनीतिमा लागे पनि पछिल्लो ६ महिनादेखि कुनै पार्टीमा नरही स्वतन्त्र रूपमा रहेको बताए ।

ठूल्ठूला पार्टीका उम्मेदवारले जितेर गएपनि कुनै विकास नभएको र जनताको जीवनस्तर माथि नउठेकाले आफू स्वतन्त्र उम्मेदवार बनेको उनको भनाइ थियो । ‘जनताले निर्वाचित गरेर पठाए पनि विकास देखिने गरी नभएपछि स्वतन्त्र रुपमा उम्मेदवारी दिएर निर्वाचनमा होमिएको छु । घरदैलोमा पनि जनता पक्षमा देखिएका छन् , सकारात्मक छन् । नतिजा पक्षमै आउने लाग्छ,’ उनले भने ।

जसपाको युवा संगठन समाजवादी युवा संघको केन्द्रीय उपाध्यक्ष भइसकेका उनले भ्रष्टाचारलाई नियन्त्रण गर्न र समाजको उत्थानकै लागि लागिपर्ने बताए ।

‘दलहरूले व्यक्तिगत स्वार्थका लागि तालमेल र गठबन्धन गरेर जनतालाई फेरि भ्रमित पार्ने काम दोहोर्‍याइरहेका छन्, अहिले जनता जागरुक भएकाले मतदाताहरूले विश्वास गरेर मत दिइनु नै मेरो जित्ने आधार हो,’ उनले भने ।