झापा १ मा कांग्रेस र एमालेका ‘हेवीवेट’बीच प्रतिस्पर्धा, नयाँ मतदाता र स्वतन्त्र उम्मेदवार प्रमुख चुनाैती

२९ कात्तिक, बनियानी । झापा क्षेत्र नं. १ ले यतिबेला मुलुककै ध्यान खिचेको छ । आगामी मंसिर ४ गते हुने प्रतिनिधिसभा तथा प्रदेशसभा निर्वाचनमा दुई ठूला दल नेपाली कांग्रेस र नेकपा (एमाले)का दुई ‘हेवीवेट’ उम्मेदवारबीच कडा प्रतिस्पर्धा हुँदैछ ।

चुनावलाई आफ्नो पक्षमा पार्न उनीहरु घरदैलोमा व्यस्त छन । नेपाली कांग्रेस, नेकपा (माओवादी केन्द्र) र नेकपा (एकीकृत समाजवादी)को लोकतान्त्रिक-वाम गठबन्धनका तर्फबाट कांग्रेसका महामन्त्री विश्वप्रकाश शर्मा र एमाले–राप्रपा तालमेलबाट अग्नि खरेल उम्मेदवार बनेका छन । उनीहरुसहित यो क्षेत्रमा १५ जना उम्मेदवार छन् । तीमध्ये तीन जना स्वतन्त्र उम्मेदवार छन् ।

दोस्रो संविधानसभा निर्वाचन, २०७० मा एमालेका रविन कोइराला र २०७४ को संसदीय चुनावमा माओवादी केन्द्रका राम कार्कीसँग पराजय भाेगेका शर्मा तेस्रोपटक चुनावी मैदानमा छन् । एमाले स्थायी कमिटी सदस्य खरेल आफ्नो गृह क्षेत्र झापा २ भएपनि झापा १ मा इन्ट्री गरेका छन । संसद् छिर्ने प्रयासमा विजयी मत हासिल गर्न शर्मा र खरेल अहोरात्र खटिरहेका छन् ।

महामन्त्री शर्मा सुकुम्बासी समस्या समाधान, पुल निर्माण, नदी कटान नियन्त्रण, पर्यटकीय केन्द्रका स्तरीकरण, झापा १ जोड्ने रिङरोड निर्माणलगायतका स्थानीय विकास र चासोको विषयलाई समेट्ने काेशिस दुवैले गरेका छन् । ‘जनताले स-साना कुरा खोजिरहेका छन्’, उम्मेदवार शर्माले भने, ‘त्यसैले हामी गर्न सक्ने कुरामात्र गर्छौ, नसक्ने कुराको हामी सपना बाँड्न आएको छैनौं ।’

पदमा नरहँदा पनि झापा क्षेत्र नं १ को सडक निर्माण, सामाजिक रुपान्तरण, स्वास्थ्य सेवालगायतका क्षेत्रमा काम गरेको शर्माको भनाइ छ । संविधानको रक्षा, लोकतान्त्रिक शासन पद्धतिको विकास र राजनीतिमा परिवर्तनका लागि गठबन्धन आवश्यक रहेको उल्लेख गर्दै शर्माले गठबन्धनका उम्मेदवारलाई जिताएर जनताको समृद्धिका लागि काम गर्ने अवसर दिन अपिल गरेका छन ।

एमाले-राप्रपाका साझा उम्मेदवार खरेलले आफू जहिले विकास र निर्माणको संसदीय प्रक्रियामा जाेडिएकाे बताए । ‘जनताको समस्या मेरो समस्या हो’, उनले भने, ‘मैले ती समस्या बुझेको छु ।’

मेची, निन्दा, हडियाखोलमा बर्सेनि आउने बाढीले त्यहाँका स्थानीय समस्यामा पर्ने भएकाले तटबन्धन निर्माण गर्न आफू प्रतिवद्ध रहेको खरेलको भनाइ छ । हात्ती समस्या नियन्त्रणका लागि प्रभावकारी कार्य गर्ने उनले बताए । “यहाँका समग्र समस्या समाधानका लागि हामी प्रतिवद्ध छौ’, उनले भने, “हामीलाई मतदान गरे विजय गराउन मतदातासमक्ष अनुरोध गर्दछौँ ।’

शर्मा र खरेल दुवैले स्थानीय अवस्था, आवश्यकता र केन्द्रीय घोषणापत्रलाई आधार बनाएर प्रतिवद्धता जनाइरहेका छन । दुवै उम्मेदवारले आफ्नो जित सुनिश्चित भएको दाबी गरिरहे पनि परिणाम आफ्नो पक्षमा पार्न त्यति सहज छैन । २०५७ मा कांग्रेसको महाधिवेशन प्रतिनिधि हुँदै २०७२ मा केन्द्रीय सदस्यमा निर्वाचित भएका शर्मा २०७४ मा पार्टीका प्रवक्ता भए । २०७६ मा कांग्रेसको तर्फबाट सूचना, सञ्चार तथा प्रचार विभाग प्रमुख भए । उनी हाल महामन्त्री छन् ।

२०६४ र २०७० को संविधानसभा सदस्य रहेका वरिष्ठ अधिवक्ता खरेल पूर्वकानुन मन्त्री हुन्, भने हाल उनी एमालेका स्थायी समिति सदस्य र झापा इञ्चार्ज  । उनी कानुनको ज्ञातासमेत मानिन्छन् ।

झापा क्षेत्र नं १ मा लोकतान्त्रिक–वाम गठबन्धनअन्तर्गत प्रत्यक्षतर्फ प्रतिनिधिसभामा सदस्यमा शर्मा, प्रदेशसभा ‘क’ मा गोपाल तामाङ र ‘ख’ मा श्यामवीर लिम्बू चुनावी मैदानमा छन, भने एमाले-राप्रपा तालमेलअन्तर्गत खरेल, प्रदेशसभा ‘क’ मा रविन कोइराला र ‘ख’ मा सविना बजगाईँ कट्टेल छन् । मेचीनगर नगरपालिकाका १५ वटै वडा, भद्रपुरको ९, १० नम्बर वडा र बुद्धशान्ति गाउँपालिकाको ४, ५ , ६, ७ वडा मिश्रित झापा क्षेत्र नं १ मा एक लाख २० हजार ३७५ मतदाता छन् । जमध्ये करिब १३ हजार नयाँ मतदाता छन् ।

स्थानीय चुनावमा वडाध्यक्षले प्राप्त गरेको मत हेर्दा एमालेसँग ३१ हजार दुई सय ३२ मत छ भने कांग्रेससँग २४ हजार ५९ मत छ । राप्रपासँग पाँच हजार नौ सय २२ मत रहेको क्षेत्रमा माओवादीसँग तीन हजार ९०५, एकीकृत समाजवादीसँग एक हजार २५२ र लोकतान्त्रिक समाजवादी पार्टीसँग दुई सय ६२ मत छ । नयाँ थपिएको मतदाता र चुनावको मुखमा दल अदलबदलको क्रमले चुनावी प्रतिस्पर्धा पेचिलो बन्ने निश्चित छ ।