सप्तरी २ बाट जसपाका अध्यक्ष यादव किन बाहिर निस्केनन ?

३० कात्तिक, काठमाडौं । एमालेसँग चुनावी सहकार्य गरेसँगै प्रतिनिधिसभा सदस्यको उम्मेदवारी दर्ता गराएका जसपा उपेन्द्र यादव आफ्नो निर्वाचन क्षेत्र छाडेर बाहिर जान सकेका छैनन । जसपा यादव सप्तरी–२ मै केन्द्रित भएर अन्तिम समयसम्म खटिरहेका छन् । गाउँ–टोलमा चुनावी सभा गरिरहेका छन् भने घर घर धाइरहेका छन् । अघिल्ला निर्वाचनमा प्रायः मधेशका सबै क्षेत्रमा चुनावी कार्यक्रममा दौडधुप गर्ने यादव यस पटक भने अन्यत्र गएका छैनन् । अध्यक्ष यादवले किन सप्तरी–२ छोड्न सकेका छैनन ? किन अन्य क्षेत्रका चुनावी कार्यक्रममा सहभागी भएका छैनन ? भन्ने बारेमा सर्वत्र चासो बढिरहँदा उनले आफ्नो निर्वाचन क्षेत्र असुरक्षित देखेपछि बाहिर नगएको जसपाका एक नेताले बताए ।

सप्तरी–२ को चुनावी माहोल हेर्दा पहिलाको भन्दा अहिले यादवलाई कठिन देखिएको छ । जसपा अध्यक्ष यादवलाई लोकतान्त्रिक समाजवादी पार्टी (लोसपा)का केन्द्रीय सदस्य जयप्रकाश ठाकुरले कडा टक्कर दिइरहेका छन् । अझ यादवको चर्को विरोध गर्दै आएका जनमत पार्टीका अध्यक्ष सीके राउत पनि यही क्षेत्रबाट उम्मेदवार बनेपछि यादवका लागि चुनौति बनिरहेका छन् ।

जसपा अध्यक्ष यादव र लोसपा केन्द्रीय सदस्य ठाकुर यसअघि पनि चुनावी मैदानमा भिडेका थिए । २०७४ सालको चुनावमा तत्कालीन संघीय समाजवादी फोरम, नेपाल र राष्ट्रिय जनता पार्टीको गठबन्धन तथा नेपाली कांग्रेसको समर्थनमा यादव उम्मेदवार थिए । उनले २१ हजार ६२० मत पाएका थिए । त्यतिवेला उनका प्रतिस्पर्धी नेकपा (माओवादी केन्द्र)का उमेश यादवले ११ हजार ५८० मत पाएका थिए । तेस्रो स्थानमा थिए, जयप्रकाश ठाकुर । स्वतन्त्र उम्मेदवारी दिएका ठाकुरले नौ हजार ४५९ मत पाएका थिए । गत निर्वाचनमा अध्यक्ष यादवका निकटतम प्रतिस्पर्धी माओवादीका उमेश यादव अहिले सत्ता गठबन्धनबाट सप्तरी २‘ख’ बाट प्रदेश सभा सदस्यको उम्मेदवार छन । तेस्रो नम्बरमा रहेका ठाकुर भने लोसपा प्रवेश गरेर उम्मेदवार बनेका छन् ।

उनलाई सत्तारूढ गठबन्धनले समर्थन गरेको छ । अघिल्लो पटक यादवलाई समर्थन गरेको कांग्रेस मात्रै होइन, दोस्रोमा रहेको माओवादी पनि ठाकुरकै पक्षमा छ । यससँगै सत्तारूढ गठबन्धनका नेकपा (एकीकृत समाजवादी) र राष्ट्रिय जनमोर्चाले उनलाई नै समर्थन गरेको छ ।‘विपक्षीहरु एक ठाउँमा भएपछि यादवलाई सकस परेको छ’, एक नेताले भने । जसपा अध्यक्ष यादवलाई नेकपा (एमाले)ले समर्थन जनाएको छ । तर, एमाले यो क्षेत्रमा त्यति बलियो छैन । अर्कातिर, जनमत पार्टीका अध्यक्ष राउत चुनावी मैदानमा उत्रेपछि यादवलाई चुनौति मात्र थपिएको छैन उस्तै अवस्था परेमा राउतले बाजी मार्न सक्ने आँकलन पनि गरिएको छ । मधेश प्रदेशका मुख्यमन्त्री लालबाबु राउत र जसपा अध्यक्ष यादवले मधेशलाई ठगेको भन्दै राउतले आन्दोलन नै गरेका थिए ।

उनले जसपा नेतृत्वको मधेश सरकारले भ्रष्टाचार गरेको भन्दै प्रदेशका मुख्य शहर तथा जिल्ला सदरमुकाममा एक महीना प्रदर्शन गरेका थिए। त्यसको पनि असर सप्तरी–२ मा देखिएको छ भने राउत प्रतिस्पर्धीका रूपमा उभिएपछि यादवलाई आफ्नो प्रतिरक्षा कठिन भएको छ । यादवको निर्वाचन क्षेत्रमा राजविराज नगरपालिका सहित महदेवा, छिन्नमस्ता र तिलाठी गाउँपालिका पर्छन् । २०७९ वैशाख ३० मा भएको स्थानीय तहको निर्वाचनमा दुई गाउँपालिकामा लोसपा र एक गाउँपालिकामा कांग्रेसले जित हासिल गरेको छ । राजविराज नगरपालिकामा भने जसपाले जितेको थियो । स्थानीय तहको निर्वाचनमा वडाध्यक्षका उम्मेदवारले पाएको मतको आधारमा पनि यादव पछाडि नै देखिन्छन् ।

जसपाका वडाध्यक्षका उम्मेदवारले १५ हजार ३७५ र एमालेका वडाध्यक्षका उम्मेदवारले तीन हजार ६९३ मत पाएका थिए । त्यस्तै, कांग्रेसका वडाध्यक्षका उम्मेदवारले १३ हजार ३१५, लोसपाका वडाध्यक्षका उम्मेदवारले १३ हजार ५४८, माओवादीका वडाध्यक्षका उम्मेदवारले सात हजार ७७६ र एकीकृत समाजवादीका वडाध्यक्ष उम्मेदवारले तीन हजार २७१ मत पाएका थिए । यसका आधारमा हेर्दा एमाले–जसपा गठबन्धनका पक्षमा १९ हजार ६८ मत देखिन्छ भने सत्ता गठबन्धनको मत ३६ हजार ८९२ पुग्छ । सबै गणित नमिल्दा उनले आफ्नो निर्वाचन क्षेत्र छाड्न नसकेको जसपाका एक केन्द्रीय सदस्यले बताए ।