अब कांग्रेसकै नेतृत्वमा मुलुकमा आर्थिक क्रान्ति र समृद्धि हुने : डा. शेखर कोइराला

१ मंसिर, काठमाडौं । नेपाली कांग्रेसका वरिष्ठ नेता एवं प्रतिनिधिसभा सदस्य उम्मेदवार मोरङ क्षेत्र नं-६ का उम्मेदवार डा. शेखर कोइरालाले मतदान पूर्व देशभरका मतदाताहरुसँग गठबन्धन जिताउन अपिल गरेका छन् ।

सामाजिक सञ्जाल मार्फत वरिष्ठ नेता डा. कोइरालाले कांग्रेस नेतृत्वमा भएको गठबन्धनलाई विजयी बनाउँन सम्पूर्ण मतदाताहरू समक्ष कांग्रेसको रुख चुनाव चिन्ह र गठबन्धनका अन्य पार्टीको चुनाव चिन्हहरूमा भोट दिएर अत्यधिक मतले जिताउन अपिल गरेका हुन् ।

मंसिर ४ मा हुने मतदानको सन्दर्भमा निर्वाचनमा राष्ट्रको र नेपाली जनताको भविष्य मतपत्रको माध्यमबाट निर्धारण गर्न गइरहेको भन्दै कोइरालाले समस्त मतदातसमक्ष आगमी सरकार असर शासनप्रति जिम्मेवार होस् भनी हेक्का राख्नुपर्ने उल्लेख गरेका छन् ।

यसैबीच, कांग्रेसका नेता तथा मोरङ क्षेत्र नं ६ का लोकतान्त्रिक वाम गठबन्धनका प्रतिनिधिसभा सदस्यका उम्मेदवार डा. कोइरालाले कांग्रेसको नेतृत्वमा गठबन्धनको सरकार बन्ने बताएका छन् । सुनसरीको कोसी गाउँपालिका–१ स्थित लौकहीमा आज लोकतान्त्रिक वाम गठबन्धनले आयोजना गरेको विशाल चुनावीसभा कार्यक्रमलाई सम्बोधन गर्दै नेता कोइरालाले सो कुरा बताए ।

कांग्रेसको नेतृत्वमा सबै राजनीतिक परिवर्तन भएको बताउँदै अब कांग्रेसकै नेतृत्वमा मुलुकमा आर्थिक क्रान्ति र समृद्धि हुने नेता कोइरालाले बताए । गठबन्धनले जिते मात्रै लोकतन्त्र बलियो हुने भएकाले लोकतान्त्रिक वाम गठबन्धनका उम्मेदवारलाई विजयी गराउन उनले आग्रह गरे ।