नारायणकाजी श्रेष्ठ भन्छन्- निर्वाचन परिणामबारे संश्लेषण आवश्यक

७ मंसिर, काठमाडौं । नेकपा (माओवादी केन्द्र)का उपाध्यक्ष नारायणकाजी श्रेष्ठले निर्वाचनमा पार्टीलाई प्राप्त मत परिणामको समग्र विश्लेषण र संश्लेषण गर्नुपर्ने बताएका छन् ।

प्रदेश र प्रतिनिधिसभाको निर्वाचन मतगणना जारी रहेकै बेला बुधबार उनले अहिलेको निर्वाचनले संस्लेषणको सन्देश दिएको बताएका छन् । यसबारे पार्टीमा बहस र छलफल हुनुपर्ने उनको तर्क छ ।

निर्वाचनको परिणामबारे अहिलेसम्म माओवादीका ठूला नेता कसैले पनि टिप्पणी गरेका छैनन् । सबैले नतिजा कुरिरहेका छन् । तर, नेता श्रेष्ठले भने बुधबार सामाजिक सञ्जालबाट निर्वाचन परिणामबारे विश्लेषण र संश्लेषण गर्नुपर्ने तर त्यसका लागि घोत्लिन जरुरी नभएको उल्लेख गरेका छन् । उनले सबै आँधीबेरी जीवन ध्वंश गर्न नभई बाटो सफा गर्न पनि आउने बताएका छन् ।

‘निर्वाचन परिणाम आइरहेका छन् । यसले निश्चित सन्देशहरु दिएको छ । यसबारेमा समग्र विश्लेषण, संश्लेषण गर्नै पर्छ । त्यसका लागि धेरै घोत्लिनुपर्ने स्थिति पनि छैन । निष्कर्ष सहज बोधगम्य नै छ । तर अहिले यति मात्र ।’

उनले थप भनेका छन्- ‘बुद्ध शिक्षाको महत्वपूर्ण निम्न अंशलाई मनन गरौं । सबै आँधिबेरीहरु तपाईको जीवन ध्वंश गर्न मात्र आउँदैनन्, कुनै तपाईको बाटो सफा गर्न पनि आउँछन् ।’

उपाध्यक्ष श्रेष्ठ पार्टीमा विचार र सांगठानिक मामिलामा अध्यक्ष प्रचण्डसँग फरक मत राख्ने नेतामा पर्दछन् । चुनावी गठबन्धन एमालेसँग गर्नुपर्ने धारणा राख्दै वामघटकबीच चुनावी तालमेलको पक्षमा मत राख्दै आएका थिए । तर अध्यक्ष प्रचण्डसहित प्रभावशाली नेताहरु कांग्रेससँग चुनावी गठबन्धन बनाउन लागिपरेपछि उनको मत गौण बन्न पुगेको थियो । सोहीबेला देखि नै उनी असन्तुष्ट छन् ।