निर्वाचनमा हारपछि झाक्रीले भनिन्– समाजको पिँधसम्म पुगेर बुझ्ने मौका पाएँ

७ मंसिर, काठमाडौं । नेकपा (एकीकृत समाजवादी)की नेतृ रामकुमारी झाक्रीले आफ्नो पराजयलाई सामान्य विषय भएको बताएकी छन् । हालै सम्पन्न प्रतिनिधिसभा सदस्य निर्वाचनमा गुल्मी २ बाट एमालेका गोकर्ण विष्टसँग हार व्यहोरिएपछि उनले सञ्जालमार्फत निर्वाचनमा जय र पराजय सामान्य विषय भएको बताएकी हुन् । करिब २ हजार मतले हार व्यहोरेकी उनले विष्टलाई बधाइ समेत दिएकी छन् ।

उनले राजनीतिलाई गलत प्रयोग भइरहेको विषयको ज्ञान प्राप्त भएको बताउँदै ‘‘समाज र सामाजिक जीवनका थुप्रै पक्षको बारेमा समाजको पिँधसम्म पुगेर हेर्ने, बुझ्ने, जान्ने मौका पाएँ’लेखेकी छन् । उनले साढे दुई दशकमा समाजलाई गलत प्रयोग गरिएको विषय थाहा पाएको र यो गम्भीर र डरलाग्दो विषय भएको दाबी गरेकी छन् ।

झाक्री पूर्व एमाले नेतृ हुन् । एमालेका अध्यक्ष समेत रहेका तत्कालीन प्रधानमन्त्री केपी शर्मा ओलीले दुई दुई पटक प्रतिनिधिसभा विघटन गरेपछि पार्टी नेतृत्वसँग असन्तुष्ट राख्दै अलग्गै गठन गरिएको नेकपा एकीकृत समाजवादी गठन गर्दा उनी त्यतै लागेकी थिइन् ।

यो पटक एकीकृत समाजवादीका अध्यक्ष माधवकुमार नेपालले उनलाई सो क्षेत्रमा पूर्व सहकर्मी एमालेका विष्टसँग प्रतिस्पर्धा गर्न टिकट दिएका थिए ।पराजित भए पनि गुल्मी जिल्लाको समग्र विकास र समृद्धिको यात्रामा म सधैँ साथ रहने प्रतिवद्धता जनाएकी छिन् ।

झाक्रीलाई माओवादी केन्द, कांग्रेस, जनमोर्चाको समर्थन थियो भने विष्टलाई जसपा, राप्रपाको समर्थन थियो ।