एआईजी बढुवाको सम्मुखमा दुई डीआईजीविरुद्ध आईजीपी सचिवालयमा उजुरी

१३ मंसिर, काठमाडौं । एआईजी बढुवाको मुखमा दुई डीआईजीलाई आर्थिक अनियमितताको आरोपसहित प्रहरी प्रधान कार्यालयमा उजुरी परेको छ । प्रहरी महानिरीक्षकको सचिवालयमा डीआईजीद्वय नलप्रसाद उपाध्याय र मसाउद आलम खाँविरुद्ध आर्थिक अनियमितता गरेको उजुरी परेको हो ।

निर्वाचन सकिए लगत्तै नेपाल प्रहरीमा रिक्त रहेका एआइजी पदमा बढुवा प्रयास शुरु हुँदा उनीहरु विरुद्धको उजुरीले आईजीपी धीरजप्रताप सिंहका व्याजीले बढुवा नपाउने निश्चित जस्तै भएको छ । डीआईजीबाटै घर जान चार महिना बाँकी भएको बेला मधेश प्रदेश र लुम्बिनी प्रदेशको कमाण्ड सम्हाली रहेका खाँ र उपाध्यायले सीमा क्षेत्रमा तस्करी बढाएको, सहकर्मीहरुसँग आर्थिक सहयोग मागेको तथा कार्यालयका लेखा प्रमुखसँग खरिदको हिसाब मिलाउन दबाब दिएको भन्दै आईजीपी सचिवालयमा उजुरी परेको एक प्रहरी अधिकारीले बताए ।

पछिल्लो केही महिनायता मधेसका सीमा नाकामा प्रहरी मिलेमतोमा खुलेआम तस्करी बढेको छ । डीआईजी खाँ आफैंले अधिकाश सीमा क्षेत्रमा घुमुवा र सीमा चौकी इन्चार्ज खटाएर पैसा उठाइरहेका छन् । त्यो पैसा शक्तिकेन्द्रहरुसम्म पुगेको विषयले गृहमन्त्रालयसम्म चर्चा चलेको थियो । अहिले नयाँ सरकार नबनीसकेको अवस्थामा यही सरकारबाट रिक्त रहेको चार एआईजीमा बढुवा गराउन नेपाल प्रहरीभित्र सो प्रयास शुरु भएको अवस्थामा उनीहरुविरुद्ध उजुरी परेपछि प्रहरी प्रधान कार्यालयले छानविन गर्ने जनाएको छ ।

हाल नेपाल प्रहरीमा एआईजीका चार पद रिक्त छन् । नयाँ सरकार बन्न समय लाग्ने भएकाले अहिलेकै सरकारले रिक्त पदमा बढुवा गर्नुपर्ने प्रहरी महानिरीक्षकलाई बढुवा आकांक्षीहरुले दबाब दिन थालेका छन् । निर्वाचनको अन्तिम परिणाम आउँदा गठबन्धनबीचकै दलहरु मिलेर सरकार बन्ने/नबन्ने भन्ने विषयमा एकिन नहुँदा प्रहरी महानिरीक्षकलाई दबाब दिन थालेका हुन् । लामो समय अवधि एआईजी पद रिक्त नराखी बढुवा गर्नुपर्ने आकांक्षीहरुको दावी छ । स्रोतका अनुसार बढुवाका लागि आन्तरिक तयारी भइसकेको छ । तर सरकार नै कामचलाउ भएकाले यही सरकारबाट एआईजी बढुवा गर्न कठिन हुने देखिएको गृहमन्त्रालय स्रोतले जनाएको छ ।

रिक्त पदमा बढुवाका लागि एक दर्जन डीआईजी प्रतिस्पर्धामा छन् । सिनियर टीमबाट तीन जना छन् । जसमा नलप्रसाद उपाध्याय, मसाउद आलम खाँ र मोहन आचार्य छन् । तर उनीहरुलाई बढुवा गर्दा तीन महिना मात्रै एआईजी हुने भएकाले उनीहरुको बढुवा हुन कठिन छ । नयाँ ब्याचका डीआईजीहरु कार्यक्षमतामा पनि अब्बल र पहुँचमा पनि अगाडि भएकाले उनीहरु नै बढुवामा पर्नेछन् । अर्काेतर्फ चार पदका लागि दर्जन धेरै प्रतिस्पर्धामा भएकाले पनि टक्कर चर्काे छ । डीआईजीमा ज्येष्ठताको वरियताअनुसार वसन्तबहादुर कुँवर, अशोक सिंह, टेकप्रसाद राई, दीपक थापा, श्यामलाल ज्ञवाली, किरण बज्राचार्य, मीरा चौधरी, रामदत्त जोशी, सन्दीप भण्डारी, किरण राणा, दुर्गा सिंहलगायत प्रतिस्पर्धामा छन् । हालको ३० वर्षे सेवाहद कायमै रहेमा यही टोलीबाट एक जना चैतमा आईजीपी हुने भएकाले अहिलेको बढुवामा व्यापक चलखेल हुने बताइएको छ ।

निर्वाचन अघि विश्वराज पोखरेल, अरुण विसी, रविन्द्र धानुक मुकुन्द आचार्य अवकाश पाएका छन् । अहिले रिक्त एआईजीमा बढुवा हुने डीआईजीमध्येबाट नेपाल प्रहरीले चैतमा आईजीपी पाउनेछन् । चैतमा आईजीपी हुने भएपछि पछिल्लो व्याचीहरुले एआईजीमा बल गरिरहेका छन् ।