भगवती चौधरीले लगाइन गच्छदारको संसदीय यात्रामा पूर्णविराम

१३ मंसिर सनुसरी । नेकपा एमालेकी उम्मेदवार भगवती चौधरीले नेपाली कांग्रेसका उम्मेदवार विजयकुमार गच्छदारको संसदीय यात्रमा पूर्णराम लगाएकी छन् । अन्तिम पटक चुनाव लडिरहेका गच्छदार चौधरीसँग सुरुसरी क्षेत्र नम्बर ३ बाट पराजित भएका छन् ।

तेस्रो प्रयासमा सुनसरी क्षेत्र नम्बर ३ मा एमालेकी उम्मेदवार भगवति चौधरी विजयी भएकी हुन् । ४ हजार १३४ मत गन्न बाँकी रहँदै एमाले उमेदवार चौधरीको जित सुनिश्चत भएको हो । पछिल्लो मतपरिणामअनुसार भगवती चौधरीले ३९ हजार २९७ मत पाएकी छन् । उनका प्रतिस्पर्धी नेपाली कांग्रेसका विजय गच्छदारले ३३ हजार ८६३ मत पाएका छन् ।

उनीहरुबीचको मतान्तर ५ हजार ४३४ मत रहेको छ । गणना हुँन बाँकी मत भन्दा चौधरीको मतान्तर बढी छ । अन्तिम मतपरिणाम सार्वजनिक हुनुअगावै चौधरीको विजय सुनिश्चत भएको हो । चीर प्रतिद्वन्द्वी कांग्रेसका गच्छदारलाई हराउँदै चौधरीले दुईपटकको हारको बदला पनि लिएकी छन् ।

१५ वर्षको निरन्तरको संघर्षपछि चौधरीले संसद्को यात्रा तय गरेकी हुन् । चौधरी २०७० को निर्वाचनमा उनै गच्छदारसँग पराजित भएकी थिइन् । दोस्रो संविधानसभाको निर्वाचनमा गच्छदारसँग ३६२ मतले चौधरी पराजित भएकी थिइन् ।

०७४ मा भने उनी ३२१ मतान्तरले पराजित भइन् । २०७४ को निर्वाचनमा भने गच्छदारले धाँधली गरेको भन्दै भगवतीले सर्वोच्चमा मुद्दा हालेकी थिइन् तर त्यसको फैसला अहिलेसम्म हुन सकेको छैन ।

२०४८ सालदेखि निरन्तर यसै क्षेत्रबाट निर्वाचन लड्दै आएका गच्छदार भने राजनीतिक जीवनको अन्तिम समयमा पराजित हुन पुगेका छन् । ६ पटकका विजेता गच्छदार सातौँपटक भने पुरानै प्रतिस्पर्धीसँग पराजित भएका छन् ।