विद्यार्थी नेता अयडीको हत्या आरोपमा वडाध्यक्षसहित ३ जना पक्राउ

१५ मंसिर, काठमाडौं । बाजुरामा एमालेनिकट विद्यार्थी संगठन अनेरास्ववियुका केन्द्रीय सदस्य चेतन अयडीको हत्या आरोपमा त्रिवेणी नगरपालिका–७ का वडाध्यक्ष जुद्धबहादुर अयडीसहित ३ जनालाई प्रहरीले पक्राउ गरेको छ ।

मृतकका परिवारले दिएको किटानी जाहेरीका आधारमा अनुसन्धानका लागि वडाध्यक्ष अयडीलाई पक्राउ गरिएको जिल्ला प्रहरी कार्यलयले जनाएको छ । क्राउ परेका अन्य दुई जनाको परिचय खुलाइएको छैन ।

अनेरास्वियुको सुदूरपश्चिम विश्वविद्यालय राष्ट्रिय कमिटीका अध्यक्ष समेत रहेका अयडीको मंसिर ४ गते त्रिवेणी नगरपालिका–७ को नाटेश्वरी आधारभूत विद्यालय मतदान केन्द्रमा मतदानका क्रममा भएको विवादलाई लिएर कांग्रेसका कार्यकर्ताले गरेको सांघातिक हमला गरी हत्या गरेको बताइएको छ ।

मतदान सकेर घर फर्किएका अयडीमाथि बाटोमै हमला गरी घाइते बनाएकामा पुनः राति घरमै गएर आक्रमण गरेर  बेहोस तुल्याइदिएका थिए । उपचारका क्रममा उनकाे मृत्यु भएकाे थियाे ।

उक्त दिन मतदानकै क्रममा भएको विवादलाई लिएर प्रहरीले गोली चलाउदा कांग्रेस कार्यकर्ता सञ्जित अयडीको ज्यान गएको थियो । विवादपछि स्थगित मतदान पछिछ मंसिर १० मा पुनः मतदान भएको थियो ।

गोली चलाइएका र हत्या घटनाको निष्पक्ष छानबिन गरी दोषीमाथि कारवाहीको माग गर्दै मतगणना समेत दलहरुले गर्न सुरु गर्न नमानेका कारण मतगणना हुन सकेको थिएन ।

त्यसपछि निर्वाचन आयोगले सहसचिवको नेतृत्वमा जाँचबुझ टोली पठाई तयार पारेकाे स्थलगत प्रतिवेदनमाथि छलफलपछि बुधबार मात्र मतगणना सुरु गर्न जिल्लाको मुख्य निर्वाचन अधिकृतको कार्यालयलाई निर्देशन दिएको थियो । निर्देशनपछि कार्यालयले बिहीबार सवैदलीय बैठक राखेर सहमति जुटाई केही अघिबाट मात्र मतगणना शुरु भएको छ ।