पुस १५ भित्र अन्तर्घातीको विवरण पठाउन कांग्रेस अनुशासन समितिको निर्देशन

१८ मंसिर, काठमाडौं । नेपाली कांग्रेसको अनुशासन समितिले निर्वाचनमा अन्तर्घात गरी पार्टीका आधिकारिक उम्मेदवारहरुलाई हराउन सहयोग गर्नेहरुको नाम पुस १५ गतेभित्र केन्द्रमा पठाउन पार्टीको तल्लो निकायलाई परिपत्र गरेको छ ।

कांग्रेसले ४ मंसिरको चुनावमा अन्तर्घात गर्नेलाई कारबाहीका लागि केन्द्रीय अनुशासन समितिमा १५ पुसभित्र नाम पठाउन भनेको हो ।

आइतबार एक विज्ञप्ति जारी गरी कांग्रेस केन्द्रीय अनुशासन समितिले चुनावमा पार्टी र सत्ता गठबन्धनका उम्मेदवारलाई असहयोग गरेको भनी जिल्ला एवं प्रदेश अनुशासन समितिमा परेका उजुरीमाथि चाँडै निर्णय गरेर केन्द्रमा पठाउन भनिएको छ ।

समितिले जिल्ला र प्रदेश अनुशासन समिति गठन नभएको भए तत्काल अनुशासन समिति गठन गरी कारबाहीको निर्णयसहित १५ पुसभित्र केन्द्रीय अनुशासन समितिमा पठाउन भनिएको छ ।

पार्टीले गठबन्धन गरेर चुनावमा गएको भन्दै असन्तुष्ट बनेका कांग्रेस नेता तथा कार्यकताहरुले मंसिर ४ को मतदानमा पार्टीलाई सहयो ग नगरेको गुनासो आएपछि केन्द्रले यस्तो निर्देशन दिएको हो ।