कांग्रेस नेतृत्वको सरकारले सुशासनका विषयमा सम्झौता गर्दैनः कोइराला

२० मंसिर, बिराटनगर । नेपाली कांग्रेसका वरिष्ठ नेता डा. शेखर कोइरालाले कांग्रेस नेतृत्वमा गठबन्धनको सरकार बन्ने बताएका छन् । उनले सरकार गठनका विषयमा सत्तारुढ दलबीच छलफल चलिरहेको भन्दै अब आउने कांग्रेस नेतृत्वको सरकारले जनतालाई सुशासन दिने कुरामा कसैसँग सम्झौता नगर्ने बताएका छन् ।

विराटनगरमा कांग्रेस यूवा नेता एवं प्रखर वक्ता गुरुराज घिमिरेको पुस्तक ‘बाटो विराएको राजनीति’ सार्वजनिक कार्यक्रममा कोइरालाले आगामी सरकारका अगाडी धरै चुनौती रहेको र ती चुनौती पार लगाउन सहज पनि नभएको बताए । उनले जनताले चाहेको विषय नै सुशासन भएकाले यसमा आउने सरकार कटिबद्ध रहने दावी गरे ।

उनले सत्ता गठबन्धनले सरकार गठनका लाागि स्पष्ट बहुमत ल्याउन नसक्नुमा धेरै कारण रहेको भन्दै अब यसलाई सहज रुपमा लिएर गठबन्धन अगाडी बढ्ने बताए । नेता कोइरालाले भने, ‘गठबन्धनकै सरकार बन्छ, यसमा कुनै चिन्ता गर्न आवश्यक देख्दिनँ । त्यो सरकारले तपाई हामीले खोजेको जस्तो काम गर्न सक्छ कि सक्दैन ? यसमा चुनौती छ ।’

कांग्रेसको साख गिर्न नदिने भन्दै उनले सुशासनको सवालमा कुनै सम्झौता नगर्ने बताए । प्रधानमन्त्री को बन्न भन्ने कुरा धेरै ठूलो विषय नभएको भन्दै उनले ठूलो पार्टी भएको हिसाबले पनि प्रधानमन्त्रीमा कांग्रेसको दावी स्वभाविक रहेको बताए । उनले जनतालाई उचित डेलिभरी दिन सक्ने सरकार बन्ने बताए । कोइरालाले गठबन्धनसँग के कसरी अगाडी बढ्ने भन्ने विषयमा पार्टीभित्र छलफल हुने र उचित निर्णय लिने पनि बताए ।