खैरो हेरोइनसहित उपमेयरका छोरा पक्राउ

२५, मंसिर, धनगढी । कञ्चनपुरमा नगरपालिकाका उपमेयर (प्रमुख)की छोरा लागू औषधसहित पक्राउ परेका छन् । कञ्चनपुरको पुनर्वास नगरपालिका–६ बाट सशस्त्र प्रहरीले अवैध लागुऔषध खैरो हेरोइनसहित ३० वर्षीय पंकज पन्तलाई समातेको हो।

पक्राउ परेका ती युवक शुक्लाफाँटा नगरपालिकाकी उपमेयर कल्पना जोशी पन्तका ३० वर्षीय छोरा पंकज रहेको बताइएको छ । शनिबार दिउँसो सशस्त्र प्रहरीको पुनर्वासस्थित बर्डर आउट पोष्ट (बीओपी)बाट खटिएको टोलीले शनिबार दिउँसो भन्सारस्थित चेक प्वाइन्ट उनलाई खैरो हेरोइनसहित पक्राउ गरेको प्रहरीले जनाएको छ । उनको साथबाट से ३ प ८६९१ नम्बरको मोटरसाइकल पनि बरामद गरिएको छ ।

अभियुक्त पंकजको साथबाट २० दशमलव ४ ग्राम खैरो हेरोइन बरामद गरिएको प्रहरीले जनाएको छ। पक्राउ परेपछि उनलाई छुटाउन प्रहरीलाई विभिन्न नेताहरुको फोन दबाब आइरहेको प्रहरी स्रोतको दाबी छ ।

अभियुक्तले पुनर्वाससँग सीमा जोडिएको भारतको बसहीस्थित मिलन बजारबाट लागुऔषध खरिद गरी लुकाइछिपाइ ल्याइरहेकाे अवस्थामा पक्राउ परेकाे प्रहरी अनुसन्धानबाट खुलेको प्रहरीकाे दाबी छ । उनलाई इलाका प्रहरी कार्यालय त्रिभुवनबस्तीमा राखिएको छ ।