सुन काण्डमा पक्राउ परेका डीएसपी केसीलाई निलम्बन गर्न सिफारिस

१२ पुष, काठमाडौं । रुपेन्देहीको इलाका प्रहरी कार्यालय बुटवलका प्रहरी नायब उपरीक्षक (डीएसपी) ठगबहादुर केसीलाई निलम्बन गर्न प्रहरी प्रधान कार्यालय नक्सालले गृह मन्त्रालयमा सिफारसि गरेको छ ।

पक्राउपछि अनुसन्धानका लागि हिरासतमा राखिएका उनलाई निलम्बन गर्न गृह मन्त्रालयमा सिफारिस गरेको प्रहरी प्रधान कार्यालय स्राेतले जनाएकाे छ ।

अभियोगमाथि थप अनुसन्धान गर्नुपर्ने देखिएको भन्दै निलम्वन गर्न सिफारिस गरिएको हो । प्रारम्भिक अनुसन्धानमा उनको गतिविधि शंकास्पद देखिएको बताइएको छ ।

सुन व्यापारीहरूसँग रकम असुली गरेको सूचनापछि केन्द्रीय अनुसन्धान ब्युरोको टोलीले उनलाई आइतबार साँझ निवासबाट पक्राउ गरेको थियो । पक्राउपछि उनकै घरबाट ३५ तोला सुन, १८ लाख रुपैयाँको चेक बरामद भएको थियो ।

गत मंसिरमा बुटवलका एक व्यापारीले ल्याएको सुन नियन्त्रणमा लिएर आफैंले राखेको सूचनाका आधारमा केसीलाई सीआईबीको टोलीले पक्राउ गरिएको थियो ।