ट्राफिक नियम उल्लंघनको जरिवानामा व्यापक वृद्धि

१२ पुष, काठमाडौं । काठमाडौं उपत्यका ट्राफिक प्रहरीले ट्राफिक नियम उल्लंघनमा जरिवानाकाे मात्रामा व्यापक वृद्धि गरेकाे छ । उपत्यका ट्राफिक प्रहरी कार्यालय रामशाहपथले पुस महिनादेखि लागू हुने गरी जरिवाना रकम बढाएको प्रवक्ता एसएसपी राजेन्द्रप्रसाद भट्टले जानकारी दिए ।

ट्राफिक नियमका १६ शीर्षकमा जरिवाना बढाइएको छ । यसअघिका ५०० देखि १५०० रूपैयाँ जरिवाना लाग्दै आएको शीर्षकमा १५०० रूपैयाँ मात्रै गराइएको छ ।

२०७५ सालमा ट्राफिक प्रहरीले अधिकतम जरिवाना गर्न सक्नेगरी अधिकार प्रत्यायोजन गरिएकोमा त्यही आधारमा जरिवाना रकम बढाइएको प्रवक्ता एसएसपी राजेन्द्रप्रसाद भट्टले बताए ।

जरिवाना बढाउँदा ट्राफिक नियमको पालना गरिने र दुर्घटनामा कमी आउने विश्वासको कार्यालयको छ । दैनिक ३ हजार देखि ४ हजारसम्म ट्राफिक नियम उल्लंघन गर्नेहरु पाइएको कार्यालयको दाबी छ ।