विकास निर्माणकाे ढिलासुस्ती हटाउन खटिइन् सांसद माझी

१८ पुष, लमजुङ । प्रतिनिधिसभा सदस्य उर्मिला माझीले विकास निर्माणका काममा देखिएको ढिलासुस्ती हटाउन र समयमा काम सम्पन्न गरी जनतालाई प्रभावकारी सेवा दिन सक्रिय पहल गरेकी छन् ।

निर्वाचनमा विजय भएपछि जिल्ला आएकी माओवादी केन्द्रकी सांसद माझीले प्रमुख जिल्ला अधिकारी र पूर्वाधार प्रमुखलगायतसँग छलफल गर्दै विकासका कामहरू तोकिएको समयमा नसक्दा जनताले असुविधा भोग्न बाध्य हुनुका साथै जिल्लाको परिचय पनि बिग्रने बताइन् ।

सो अवसरमा उनले लमजुङको भोटेओडार बेलघारी खण्डको सडकको समस्या हल गर्न तथा सडक सुधार र स्तरोन्नति तत्काल गर्न पनि आग्रह गरेकी थिइन् । सो सडक खण्डको निर्माण समयमा नहुँदा दोर्दी गाउँपालिका र दूधपोखरी गाउँपालिका जाने यातायात नराम्ररी प्रभावित हुने गरेको छ ।

प्रमुख जिल्ला अधिकारी सुशील वैद्यले यसलाई गम्भीरतापूर्वक लिएको र तत्काल काम अगाडि बढाउने बताए ।