ब्राउन सुगरसहित प्रहरीका असइ घनश्याम लाखे पक्राउ

२० माघ, काठमाडौं । लागूऔषध ब्राउन सुगर ‘खैरो हेरोइन’सहित नेपाल प्रहरीका असइ पक्राउ परेका छन् । भारतको जोगवनीदेखि मोटरसाइकलमा आउँदै गरेको अवस्थामा विराटनगर महानगरपालिका-१५ रानीस्थित १ नम्बर ढाटबाट असइ ‘प्रहरी सहायक निरीक्षक’ घनश्याम लाखे पक्राउ परेका हुन्।

उदयपुरको कटारी नगरपालिका-५ घर भएका ३० वर्षीय लाखे प्रदेश १-०३-००१ प १३५९ नम्बरको मोटरसाइकलमा सवार थिए। असइ लाखेलाई लागूऔषध नियन्त्रण ब्युरो विराटनगरको टोलीले बिहीबार दिउँसो ४:२० बजेतिर पक्राउ गरेर शुक्रबार आज सार्वजनिक गरेको प्रहरीले जनाएको छ ।

मोटरसाइकल रोकेर चेकजाँच गर्दा उनको साथबाट १.५२ ग्राम ब्राउन सुगर बरामद गरिएको छ । पक्राउ परेका असइ लाखे इलामको प्रहरी चौकी कर्फोक दरबन्दी भएर इलामकै इलाका प्रहरी कार्यालय मंगलबारेमा कार्यरत रहेको बताइएको छ ।

ब्राउन सुगर बरामद भएसँगै असइ लाखेले चलाएको मोटरसाइकलको पछाडि बसेका इलामको माङ्सेबुङ गाउँपालिका-२ का २३ वर्षीय मनोज अधिकारीलाई पनि प्रहरीले पक्राउ गरेको छ।