बस चालकलाई कारबाहीकाे माग गर्दा वीरेन्द्रगरमा झडप, प्रदर्शनकारीमाथि ४ राउण्ड अश्रुग्यास प्रहार

१ फागुन, सुर्खेत । आइतबार बिहान सडकमा जेब्राक्रसमा बाटो काटिरहेकी नदी रावतको बसको ठक्करबाट मृत्युको विषयमा भएको प्रदर्शनका क्रममा सोमबार दिउँसो वीरेन्द्रनगरमा प्रहरी र प्रदर्शनकारीबीच झडप भएको छ । झडपमा एक प्रहरी घाइते भएका छन् ।

बसका चालकलाई पक्राउ गरी कारबाही गर्न र मृतक परिवारलाई उचित क्षतिपूर्ति दिन माग गर्दै आइतबारदेखि आफन्त रस्थानीयले आइतबारदेखि गरेको प्रदर्शन सोमबार दिउँसो झनै चर्किएको छ ।

प्रदर्शनकारीहरुले माग पूरा नभएसम्म कुनैपनि सवारीसाधन चल्न नदिने अडान राख्दै प्रदर्शन जारी राखेका बेला सोमबार भने यातायात व्यवसायी प्रदर्शनकारीविरुद्ध जाइलागेपछि दुई पक्षबीच भीडन्त भएको थियो । सो क्रममा पत्रकार बलबहादुर थापा गम्भीर घाइते भएका छन् उनको उपचार माया अस्पतालमा भइरहेको छ ।

स्थितिलाई साम्य पार्न तैनाथ प्रहरीमाथि प्रदर्शनकारीले ढुंगा प्रहार गर्दा एक प्रहरी गम्भीर घाइते भएका छन् । त्यसपछि प्रहरीले प्रदर्शनकारमिाथि ४ राउण्ड अश्रुग्यास प्रहार गरेको छ ।

दुवै पक्षबीच झडप हुन नदिन वार्ताको प्रयास भइरहेको सुर्खेतका प्रमुख जिल्ला अधिकारी नारायण प्रसाद सापकोटाले बताए । बजारक्षेत्रमा ठूलो संख्यामा प्रहरी परिचालन गरिएको उनले बताए ।

प्रदर्शनकारीहरुले भने प्रहरीले यातायात व्यवसायीहरुको पक्ष लिएर आफूहरुमाथि दमन गरेको आरोप लगाएका छन् ।