गेटामा विश्वविद्यालय हैन, कलेज चलाएर देखाउन डा. केसीको चुनौती

१ फागुन, काठमाडौं । चिकित्सा शिक्षा सुधारका अभियन्ता डा. गोविन्द केसीले सरकारले गेटामा मेडिकल कलेजमा विश्वविद्यालय चलाउने आवश्वसन दिएर कदेज संचालनलाई अलमल्याउन खोजेको बताएका छन् ।

सोमबार उनले विज्ञप्ति जारी गरेर गेटामा विश्वविद्यालयको हल्लाले मेडिकल कलेज सञ्चालनको कामलाई पछाडि धेकेल्न खोजेको बताएका हुन् । सरकारले हचुवाको भरमा गेटामा विश्वविद्यालयको हल्ला चलाएर कलेज चलाउने काम समेत ढिला गर्ने योजना रचेको उनको बुझाइ छ ।

उनले गेटामा विश्वविद्यालय नभई मेडिकल कलेज संचालन गरेर देखाउन सरकारलाई चुनौति दिएका छन् ।

‘‘हचुवाका भरमा त्यस्ता निर्णय गर्दै जाने र सरकारैपिच्छे नीति फेर्दै जाने हो भने गेटामा मेडिकल कलेज सञ्चालनको काम अनावश्यक रुपमा ढिला हुने निश्चित छ’ उनले विज्ञप्तिमा भनेका छन् । उनले स्रोतको जोहो नै नगरी हचुवामा सरकारले विश्वविद्यालय चलाउने हल्ला चलाउनुले कुन गुणस्तरको शिक्षा दिन खोजिएको भन्दै प्रश्न गरेका छन् ।
‘‘‘प्रक्रियामा छलछाम गरी तथा स्रोतको जोहो नै नगरी विश्वविद्यालयजस्तो ठूलो संरचना बनाउने निर्णय गर्नाले कहिले र कुन गुणस्तरको शिक्षा सम्भव छ भन्ने अर्को प्रश्न उठाउँछ’ उनले भनेका छन् ।

सरकारको निर्णयले तत्काल रेफरल अस्पतालसहितको विशेषज्ञ सेवा संचालन र एमबीबीएसको पठनपाठनको पर्खाइमा रहेका सुदूरपश्चिमका नागरिकको आशामाथि तुषारापात गरेको उनको आरोप छ । केसीले विगतमा आफूसँग भएको सहमति अनुसार गेटामा मेडिकल कलेज सञ्चालनको काम तत्काल अघि बढाउन आग्रह गरेका छन् ।

साथै पूर्वसहमतिअनुसार सबै प्रदेशमा कम्तीमा एकसहित हामीसित सहमति भए बमोजिम मेडिकल कलेज निर्माणको कामलाई अघि बढाउन सरकारको ध्यानाकर्षण गराएका छन् । सहमति कार्यान्वयन नभए पुनः संघर्षमा होमिने बताएका छन् ।

उनले बाँकेकी एकल महिला निर्मला कुर्मीको न्यायका लागि झण्डै डेढ महिनादेखि आन्दोलनरत अभियन्ताहरुको माग तत्काल सुनुवाइ गर्न समेत सरकारसँग आग्रह गरेका छन् ।

सरकारले आइतबार मात्र गेटामा सहिद दशरथ चन्द विश्वविद्यालय संचालन गर्ने निर्णय गरेको थियो । त्यसको भोलिपल्टै सोमबार प्रधानमन्त्री प्रचण्ड कैलालीकाे धनगढी पुगेर गेटाको भौतिक संरचनाको अवलोकन गरेका छन् ।