प्रतिनिधिसभा बैठकः कांग्रेसले उठायाे नयाँ बसपार्क घटनामा सुरक्षा प्रणालीमाथि प्रश्न

३ फागुन, काठमाडौं । प्रतिनिधिसभाको नियमित बैठक सुरु भएको । अहिले बैठक जारी छ । बैठकमा सांसदहरुले सोमबार बालाजु र नयाँ बसपार्क क्षेत्रमा भएको आगजनी र लुटपाट घटनामा सुरक्षा व्यवस्थाबारे सरकारसँग प्रश्न गरेका छन् । उनीहरुले घटनाको तत्काल निष्पक्ष छानबिन गर्न माग गरेका छन् ।

नयाँबानेश्वरस्थित संघीय संसद भवनमा जारी बैठकमा सांसदहरुले विभिन्न समसामयिक विषय, भौतिक पूर्वाधारको क्षेत्रमा भइरहेका ढिलासुस्तीप्रति सरकारको ध्यानाकर्षण गराएका छन् ।

सांसद प्रकाशशरण महत, विराजभक्त श्रेष्ठसहितले काठमाडौंको नयाँ बसपार्क क्षेत्रमा भएको तोडफोड र लुटपाटको घटनाप्रति सुरक्षा प्रणालीमाथि प्रश्न उठाए । घटनाप्रति सरकारको ध्यानाकर्षण गराएका छन् ।

सुरक्षा व्यवस्था राम्रो हुन नसक्दा सो घटना भएको भन्दै उनीहरुले आर्थिक मन्दीको मारमा परेका व्यवसायीका थप मर्कामा परेका बताए ।

नेपाली कांग्रेसका प्रवक्ता प्रकाशशरण महतले काठमाडौंको मुटुमै शान्ति सुरक्षाको प्रत्याभूति सरकारले गराउन सक्दैन भने दुरदराजको स्थिति के होला ? भन्दै प्रश्न गरे । उनले तत्काल दोषीलाई कारबाही गर्नुपर्ने माग गरे ।

बैठकमा सम्पत्ति सुशिद्धकरणसम्बन्धी विधेयक पेस गरिने भएको छ ।