प्रहरीकाे गाडी आगजनी र माेवाइल लुटपाटमा संलग्न थप १५ जना प्रहरीकाे नियन्त्रणमा

४ फागुन, काठमाडौं । बालाजुको माछा पोखरीमा सोबार यातायात मजदुरले १० बुँदे माग राखेर गरेको प्रदर्शनमा केही समूहले मच्चाएको प्रहरीको गाडीमा आगजनी र ल्होत्से मलमा रहेका पसलमा भएको मोवाइल लुटपाट घटनालाई लिएर प्रहरीले थप १५ जनालाई पक्राउ गरेको छ ।

सिसिटिभी फुटेज र भिडियोमा देखिएकामध्ये १५ जनालाई पक्राउ गरिएको उपत्यका अपराध अनुसन्धान कार्यालयका एसएसपी डा. मनोज केसीले जानकारी दिए ।

पक्राउ पर्नेमा काभ्रे घर भएका सुरज मगर, उदयपुरका रितेश बस्नेत र मोरङ बेलबारी घर भएका यमन राई छन् । उनीहरू ल्होत्से मलबाट मोबाइल चोर्दै गरेको भिडियोमा देखिएका हुन् ।

आगजनी र तोडफोडमा संलग्नहरु नुवाकोट घर भएका सुनिल कालिकोटे, माछा पोखरी घर भएका रोमन नगरकोटी, नुवाकोट घर भएका सुदिप तामाङ, माछा पोखरीमा व्यापार गर्ने माधव शाही, नुवाकोट घर भएका १९ वर्षीय केशव राई र सिन्धुली घर भएका इन्द्र तामाङ छन् ।

धादिङ घर भएर तार्केश्वर बस्ने चालक ईलाराज गुरुङ, उदयपुर घर भएका (सह–चालक) राजन राउत, काभ्रे घर भएका चालक हरिशरण तामाङ, धादिङ घर भएका सहचालक विकास गुरुङ, चितवन घर भएका चालक संविधान परियार र सामाखुसी घर भएर होटेलमा वेटर काम गर्ने कविन खड्गीलाई पनि प्रहरीले पक्राउ गरेको छ ।

उनीहरूलाई काठमाडाैंकाे विभिन्न स्थानबाट पक्राउ गरिएकाे हाे । उनीहरूलाइ प्रहरीले बिहीबार सार्वजिनक गरेकाे छ ।