संवैधानिक परिषद्को विवादास्पद विधेयक फिर्ता

५ फागुन, काठमाडौं । अध्यादेशमार्फत जारी भएको संवैधानिक परिषद्सम्बन्धी विवादास्पद विधेयक सरकारले फिर्ता लिएको छ । बिहीबार बसेको मन्त्रिपरिषद्को बैठकले उक्त विधेयक फिर्ता लिएर छिट्टै यससम्बन्धी अर्को विधेयक सदनमा पेश गर्ने निर्णय भएको सरकारका प्रवक्ता रेखा शर्माले जानकारी दिइन् ।

सोही निर्णय अनुसार शुक्रबार प्रधानमन्त्रीको कार्यालयले संसद सचिवालयबाट विधेयक फिर्ता ल्याएको स्रोतले जनाएको छ । तत्कालीन प्रधानमन्त्री केपी शर्मा ओलीले प्रतिनिधिसभा विघटन गर्नुअघि अध्यक्षसहित तत्काल बहाल रहेको कम्तिमा ५० प्रतिशत सदस्य उपस्थित भए बैठक बस्न सक्ने गरी संवैधानिक परिषदसम्बन्धी अध्यादेश ल्याएका थिए ।

त्यही अध्यादेशअनुसार ६ सदस्यीय संवैधानिक परिषद्का ३ जना मात्र उपस्थित भएर संवैधानिक निकायहरुमा धमाधम नियुक्ति सिफारिस गरेको थियो ।

त्यसरी सिफारिस भएर नियुक्त भएका संवैधानिक निकायका पदाधिकारी र सदस्यहरुविरुद्ध सर्वोच्चमा मुद्दा समेत परेको थियो । सो मुद्दा टुंगो लाग्न बाँकी नै छ । मुद्दामा सुनुवाइका लागि बिहीबार पेशी तोकिएपनि हेर्न नभ्याइने राखेर हटाइएकेो छ ।