बालाजु घटनामा २ जना डीएसपीमाथि कारबाहीकाे सिफारिस

८ फागुन, काठमाडौं। बालाजुको माछापोखरी क्षेत्रमा यही फागुन १ गते प्रहरी र आन्दोलनकारी यातायात मजदुरहरू बिचमा भएको झडपबारे छानबिन गर्न डिआईजी मसाउद आलम खाँ नेतृत्वमा गठित समितिले प्रतिवेदन बुझाएको छ ।

समितिले पाएकाे समयसीमा ७ दिनमा अध्ययन र छानबिनकाे काम सकेर उपत्यका प्रहरी कार्यालयका एआईजी दिवेस लोहनीलाई प्रतिवेदन बुझाएको हो ।

झडपका क्रममा आन्दोलनकारीले प्रहरीको बालाजु वृत्तका दुई वडा गाडीमा आगजनी गरेर ध्वस्त पारेका थिए । त्यसपछि गृह मन्त्रालयको जिम्मेवारी समेत सम्हापलरहेका प्रधानमन्त्री प्रचण्डले निर्देशनअनुसार समिति गठन गरिएको थियो । प्रतिवेदनमा प्रहरी वृत्त बालाजुमा कार्यरत डिएसपी रविन विष्ट र प्रहरी वृत्त सोह्रखुट्टेमा कार्यरत डिएसपी गणेशबहादुर बमलाई कारबाही गर्न सिफारिस गरिएको छ ।

आगजनीबाट प्रदर्शनकारीले बालाजुका डिएसपी रविन विष्ट चढ्ने बा २ झ १४४ नम्बरको निलो रंगको स्कोर्पियो (पिकअप) र प्रहरी वृत्त बालाजुको बा १ झ ७२२४ नम्बरको माज्दा गाडी नष्ट भएका थिए ।

घठना लगत्तै डिएसपी विष्ट बालाजुबाट हटाएर रानीपोखरीमा तानएिको छ । आन्दोलनका बेला घटनास्थल खटिएका दुवै जजना डीएसपीले कर्तव्य पालना नगरेको निष्कर्षसहित ‘प्रहरी नियमावली अनुसार कारबाही गर्न सिफारिस गरिएको हाे ।

प्रदर्शन चर्किएपछि डिएसपी विष्ट गाडी छाडेर प्रदर्शन स्थलबाट भागेको र डिएसपी बम पनि घटनास्थलबाट हिँडेको पाइएको छानबिन समितिको निष्कर्ष छ ।

प्रदर्शनकारीले सोही दिन नयाँ बसपार्क क्षेत्रमा संचािलत ल्होत्से मलमा अर्जुन चालिसेले सञ्चालन गरेको एसिडिसी मोबाइल प्रालि र डायमण्ड मोबाइल प्रालि तथा गजेन्द्र न्यौपानेले सञ्चालन गरेको काठमाडौँ सुपरमार्केट प्रालिबाट मोबाइल लुटपाट गरेका थिए ।

लुटपाटबाट करिब १० करोड रुपैयाँको क्षति पुगेको उनीहरुको दाबी छ । सुरक्षा व्यवस्था कमजोर भएकै कारण लुटपाट मच्चिएको भन्दै उनीहरुले क्षतिपूर्ति सरकारले दिनुपर्ने माग गरेका छन् । आगजनी र लुटपाट घटनामा संलग्नता रहेको आरोपमा प्रहरीले हालसम्म ४६ जनालाई पक्राउ गरिसकेकोा जनाएको छ ।

काठमाडौँ उपत्यकामा ट्राफिक प्रहरीले लागु गरेको चर्को जरिवाना र पार्किङमा गरिएको कडाइको विरोधमा त्यसदिन यातायात मजदुर र व्यवसायीहरुले आन्दोलनरत गरेका थिए ।