प्रा.डा. शर्मा प्रधानमन्त्रीको निजी चिकित्सकमा नियुक्त

१६ फागुन, काठमाडौं । प्रधानमन्त्री पुष्पकमल दाहाल प्रचण्डले आफ्नो निजी चिकित्सकमा प्रा.डा. युवराज शर्मा नियुक्त गरेका छन् । गत बिहीबार बसेको मन्त्रिपरिषद बैठकको निर्णय अनुसार शर्मालाई प्रधानमन्त्री प्रचण्डको निजी चिकित्सकको नियुक्त गरिएको हो ।

डा. शर्माले हाल पाटन स्वास्थ्य विज्ञान प्रतिष्ठानको मेडिसिन विभागका प्राध्यापक तथा मेडिकल डाइरेक्टरको पदमा कार्यरत छन् । सरकारी सेवामा रहेको व्यक्तिले दोहोरो सेवा–सुविधा लिन नमिल्ने भएका कारण डा. शर्माले पाटन अस्पतालको मात्रै सेवा–सुविधा लिने बताइएको छ ।

नेपालमा दुई विषयमा एमडी गरी विदेशबाट फेलोसिप समेत गरेका डा. शर्मा नेपालका अब्बल चिकित्सकमध्येमा गनिन्छन् । डा. शर्माले उच्च विशेषज्ञता इन्टनरल मेडिसिन र पेट तथा कलेजो विषयमा गरेका छन् ।